ນວ ກຽມກວດກາຄືນອຸປະກອນເຝິກຊ້ອມ ແລະ ຕິດຕາມນັກກີລາ ຫຼັງຊຽງຂວາງເກມ ຖືກເລື່ອນບໍ່ມີກຳນົດ

1.538 13 ມ.ນ. 2020 ວົງຈອນກີລາ
ນວ ກຽມກວດກາຄືນອຸປະກອນເຝິກຊ້ອມ ແລະ ຕິດຕາມນັກກີລາ ຫຼັງຊຽງຂວາງເກມ ຖືກເລື່ອນບໍ່ມີກຳນົດ

    ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ນວ) ໄຂ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ວຽກ​ງານ​ເຕັກ­ນິກ ນຳ­ພາ​ຄະ­ນະ​ນຳ​ສະ­ຫະ­ພັນ​ກີ­ລາ ຄູ​ເຝິກ ແລະ ນັກ­ກີ­ລາ ຊຸດ​ກຽມ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ຫຼື ຊຽງ​ຂວາງ ເກມ ທ້າຍ​ອາ­ທິດ​ຜ່ານ​ມາ ຢູ່​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ (ບຶງ​ຂະ​ຫຍອງ) ໂດຍ​ການ​ເປັນ​ປະ­ທານ​ຂອງ​ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ມີ​ທ່ານ ກອງ​ແກ້ວ ແຫ່ງ​ດາ​ວົງ​ໄຊ ຫົວ­ໜ້າ​ຂະ­ແໜງ​ກີ­ລາ​ລະ­ດັບ​ສູງ ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ພ້ອມ​ດ້ວຍ​ຄະ­ນະ ແລະ ບັນ­ດາ​ຄະ­ນະ​ຮັບ­ຜິດ­ຊອບ​ວຽກ​ງານ​ເຕັກ­ນິກ​ເຂົ້າ​ຮ່ວມ​ຢ່າງ​ພ້ອມ­ພຽງ.

    ທ່ານ ສົມ​ພອນ ສອນ​ດາ­ລາ ກ່າວ​ວ່າ: ເຖິງ​ວ່າ​ລັດ­ຖະ­ບານ ໄດ້​ມີ​ການ​ແຈ້ງ​ການ​ປະ­ກາດ​ເລື່ອນ​ການ​ແຂ່ງ­ຂັນ ຊຽງ​ຂວາງ ເກມ ເຊິ່ງ​ໃນ​ເບື້ອງ​ຕົ້ນ ຈະ​ຈັດ​ໃນ​ລະ­ຫວ່າງ​ວັນ​ທີ 22 ມີ­ນາ ຫາ 1 ເມ­ສາ 2020 ອອກ​ໄປ​ແບບ​ບໍ່​ມີ​ກຳ­ນົດ​ກໍ​ຕາມ ແລະ ພວກ​ເຮົາ​ກໍ​ໄດ້​ມີ​ການ​ລົງ­ທຶນ​ເຫື່ອ­ແຮງ​ອອກ​ໄປ​ຢ່າງ​ມະ­ຫາ­ສານ ໂດຍ​ສະ­ເພາະ ຄູ​ເຝິກ ແລະ ນັກ­ກີ­ລາ ໄດ້​ພາ­ກັນ​ທຸ້ມ­ເທ​ຢ່າງ​ສຸດ​ກົກ​ສຸດ​ປາຍ ເຂົ້າ​ໃນ​ການ​ເກັບ​ຕົວ​ເຝິກ­ຊ້ອມ​ຢ່າງ​ໜັກ­ໜ່ວງ ເພື່ອ​ບໍ່​ໃຫ້­ການ​ທຸ້ມ­ເທ​ດັ່ງ­ກ່າວ ສູນ​ເສຍ​ໄປ ກໍ​ຂໍ​ຮຽກ­ຮ້ອງ​ມາ​ຍັງ​ຄະ­ນະ​ຮັບ­ຜິດ­ຊອບ​ທຸກ​ຝ່າຍ ຈົ່ງ​ພ້ອມ­ພຽງ​ກັນ​ເພີ່ມ​ທະ­ວີ​ຄວາມ​ເອົາ­ໃຈ­ໃສ່ ສືບ­ຕໍ່​ປະ­ຕິ­ບັດ​ໜ້າ­ທີ່​ຂອງ​ຕົນ ທີ່​ຂັ້ນ​ເທິງ​ມອບ​ໝາຍ​ໃຫ້​ຢ່າງ​ມີ​ກຽດ ແລະ ເຮັດ​ໃຫ້​ປາ­ກົດ​ຜົນ​ເປັນ​ຈິງ ໂດຍ​ສະ­ເພາະ​ຕ້ອງ​ມີ​ການ​ກວດ­ກາ​ຄືນ​ທາງ​ດ້ານ​ອຸ­ປະ­ກອນ​ເຝິກ­ຊ້ອມ​ກີ­ລາ ໃຫ້​ຄົບ​ຖ້ວນ​ຕາມ​ຈຳ­ນວນ​ທີ່​ຂຶ້ນ​ແຜນ​ໄວ້​ເບື້ອງ​ຕົ້ນ ສ່ວນ​ຜູ້​ຮັບ­ຜິດ­ຊອບ​ຕິດ­ຕາມ​ກີ­ລາ 28 ປະ­ເພດ ກໍ​ຕ້ອງ​ເສຍ­ສະ­ຫຼະ​ລົງ​ຕິດ­ຕາມ​ກວດ­ກາ​ນັກ­ກີ­ລາ ເພື່ອ​ໃຫ້​ເຂົາ­ເຈົ້າ​ໄດ້​ມີ​ການ ເຄື່ອນ​ໄຫວ​ເຝິກ­ຊ້ອມ​ໃນ​ຕົ້ນ​ສັງ­ກັດ​ຂອງ​ຕົນ​ເອງ​ໃຫ້​ສະ​ໝ່ຳ​ສະ­ເໝີ ແລະ ປົກ­ກະ­ຕິ ເພື່ອ​ຮັກ­ສາ​ສະ­ມັດ ຖະ​ພາບ​ຮ່າງ­ກາຍ ໃຫ້​ສົມ­ບູນ​ແຂງ­ແຮງ ແລະ ກຽມ­ພ້ອມ​ທຸກ​ສະ­ຖາ­ນະ​ການ ເຂົ້າ​ຮ່ວມ​ຊຽງ​ຂວາງ​ເກມ.

    ສຳ­ລັບ​ການ​ປະ­ກາດ​ເລື່ອນ​ງານ​ກີ­ລາ ຊຽງ​ຂວາງ ເກມ ຄັ້ງ​ນີ້ ແມ່ນ​ອີງ­ໃສ່​ສະ­ພາບ​ຂອງ​ໂລກ​ປັດ­ຈຸ­ບັນ ກຳ­ລັງ​ຂັບ​ຂັນ​ປະ​ເຊີນ​ໜ້າ​ກັບ​ການ​ແຜ່​ລະ­ບາດ​ຂອງ​ພະ­ຍາດ ເຊື້ອ​ຈຸ​ລະ​ໂລກ​ສາຍ​ພັນ​ໃໝ່ ຫຼື ໂຄ​ວິດ-19 ຢ່າງ​ຮຸນ​ແຮງ ແລະ ໄດ້​ກໍ​ໃຫ້​ເກີດ​ຄວາມ​ເສຍ​ຫາຍ​ຢ່າງ​ໃຫຍ່​ຫຼວງ​ໃນ​ຫຼາຍ​ປະ­ເທດ ດັ່ງ­ນັ້ນ ອົງ­ການ​ອະ­ນາ­ໄມ​ໂລກ ໄດ້​ມີ​ການ​ແຈ້ງ​ເຕືອນ​ໄພ​ອັນ­ຕະ­ລາຍ​ຂອງ​ພະ­ຍາດ​ດັ່ງ­ກ່າວ ພ້ອມ​ທັງ​ຮຽກ­ຮ້ອງ​ໃຫ້​ມີ​ການ​ປ້ອງ​ກັນ​ໃຫ້​ດີ ແລະ ຈຳ­ກັດ​ການ​ໂຮມ​ຊຸມ­ນຸມ​ຂອງ​ຄົນ​ຈຳ­ນວນ​ຫຼາຍ ເພື່ອ​ປ້ອງ​ກັນ​ການ​ແຜ່​ລະ­ບາດ​ຂອງ​ພະ­ຍາດ ເວົ້າ​ລວມ ເວົ້າ​ສະ­ເພາະ​ໃນ ສປປ ລາວ ຂອງ​ພວກ​ເຮົາ ມາ​ເຖິງ​ປັດ­ຈຸ­ບັນ​ຍັງ​ບໍ່​ທັນ​ມີ​ກໍ­ລະ­ນີ​ຕິດ­ເຊື້ອ​ພະ­ຍາດ​ດັ່ງ­ກ່າວ ແຕ່​ຢູ່​ບັນ­ດາ​ປະ­ເທດ​ອ້ອມ​ຂ້າງ​ພວກ​ເຮົາ ແມ່ນ​ມີ​ການ​ລະ­ບາດ​ຂອງ​ເຊື້ອ​ພະ­ຍາດ​ດັ່ງ­ກ່າວ​ແລ້ວ​ເປັນ​ວົງ​ກວ້າງ ຖ້າ​ຫາກ​ມີ​ການ​ໂຮມ​ຊຸມ­ນຸມ​ໃຫຍ່ ຈະ​ເຮັດ​ໃຫ້​ມີ​ຄວາມ​ສ່ຽງ​ຕໍ່​ການ​ຕິດ­ເຊື້ອ​ພະ­ຍາດ ຖ້າ​ເຮົາ​ບໍ່​ມີ​ມາດ​ຕະ­ການ​ປ້ອງ​ກັນ​ທີ່​ດີ ຍ້ອນ​ເຫັນ​ໄດ້​ໄພ​ອັນ­ຕະ­ລາຍ​ເຊັ່ນ​ນັ້ນ ລັດ­ຖະ­ບານ ກໍ​ຄື​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ແລະ ຫ້ອງ​ວ່າ­ການ​ສູນ​ກາງ​ພັກ ຈຶ່ງ​ໄດ້​ອອກ​ແຈ້ງ​ການ​ໃຫ້​ເລື່ອນ​ການ​ຈັດ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ການ​ສະ­ເຫຼີມ­ສະ­ຫຼອງ​ທົ່ງ​ໄຫ​ຫີນ ຖືກ​ຮັບ­ຮອງ​ເປັນ​ມໍ­ລະ­ດົກ​ໂລກ ແລະ ງານ​ແຫ່​ພະ​ເຈົ້າ​ອົງ​ຫຼວງ ເຊິ່ງ​ຈະ​ຈັດ​ຂຶ້ນ​ໃນ​ວັນ​ທີ 22 ມີ­ນາ 2020 ທີ່​ແຂວງ​ຊຽງ​ຂວາງ​ເປັນ​ເຈົ້າ­ພາບ ອອກ​ໄປ​ກ່ອນ ຈົນ​ກວ່າ​ສະ­ພາບ​ການ​ລະ­ບາດ​ຂອງ​ພະ­ຍາດ​ດັ່ງ­ກ່າວ ຈະ​ຖືກ​ຄວບ​ຄຸມ.

ຂ່າວທີ່ກ່ຽວຂ້ອງ