ຊັອບເທັນນິດລາວ ຮ່ວມຊີງແຊັມໂລກ ທີ່ປະເທດໄທ

1.641 13 ມ.ນ. 2020 ວົງຈອນກີລາ
ຊັອບເທັນນິດລາວ ຮ່ວມຊີງແຊັມໂລກ ທີ່ປະເທດໄທ

    ທັບ​ນັກ­ກີ­ລາ​ຊັອບ​ເທັນ​ນິດ​ທີມ​ຊາດ​ລາວ 5 ຄົນ ເຂົ້າ​ຮ່ວມ​ຊີງ​ໄຊ 3 ລາຍ­ການ ປະ­ເພດ​ດ່ຽວ ທີມ​ຄູ່ ແລະ ທີມ​ຊຸດ​ຊາຍ ໃນ​ການ​ແຂ່ງ­ຂັນ​ກີ­ລາ​ຊັອບ​ເທັນ​ນິດ​ຊີງ​ແຊັມ​ໂລກ 2020 ຫຼື “The King’s Cup World Tour Master 2020 International Soft Tennis Championships” ທີ່​ແຂວງ​ຊົນ​ບູ​ລີ ປະ­ເທດ​ໄທ ຮັບ​ກຽດ​ເປັນ​ເຈົ້າ­ພາບ ໃນ​ລະ­ຫວ່າງ​ວັນ​ທີ 95 ມີ­ນາ 2020.

    ທ່ານ ບຸນ​ທະ​ມາ­ລີ ຫຼວງ​ໂຄດ ຮອງ​ປະ­ທານ ແລະ ເລ­ຂາ­ທິ­ການ​ສະ­ຫະ­ພັນ​ຊັອບ​ເທັນ​ນິດ​ແຫ່ງ​ຊາດ​ລາວ ທັງ​ເປັນ​ຜູ້​ຈັດ­ການ​ກີ­ລາ​ຊັອບ​ເທັນ​ນິດ​ທີມ​ຊາດ​ລາວ ແຈ້ງ​ໃຫ້​ຊາບ​ວ່າ: ສະ­ຫະ­ພັນ​ຊັອບ​ເທັນ​ນິດ​ແຫ່ງ​ຊາດ​ລາວ ເຫັນ​ໄດ້​ໃນ​ຄວາມ​ສຳ­ຄັນ​ໃນ​ການ​ພັດ­ທະ­ນາ​ວົງ​ການ​ກີ­ລາ​ຊັອບ​ເທັນ​ນິດ​ລາວ ຢູ່​ສະ­ເໝີ ສະ­ນັ້ນ ຈຶ່ງ​ສືບ­ຕໍ່​ສົ່ງ­ເສີມ​ການ​ພັດ­ທະ­ນາ​ໄປ​ເລື້ອຍໆ ເພື່ອ​ຢາກ​ເຫັນ​ນັກ­ກີ­ລາ​ລາວ ສ້າງ​ຜົນ­ງານ​ເໜືອ​ຄວາມ​ຄາດ­ໝາຍ ທີ່​ພວກ​ເຮົາ​ໄດ້​ສ້າງ​ຜົນ­ງານ​ຄັ້ງ​ປະ­ຫວັດ­ສາດ ຄວ້າ​ຫຼຽນ​ທອງ ໃນ​ງານ​ມະ​ຫະ​ກຳ​ກີ­ລາ​ຊີ­ເກມ ທີ່​ປະ­ເທດ​ຟີ​ລິບ​ປິນ ເມື່ອ​ທ້າຍ​ປີ 2019 ຜ່ານ​ມາ ດັ່ງ­ນັ້ນ ຈຶ່ງ​ໄດ້​ສົ່ງ​ນັກ­ກີ­ລາ​ຊັອບ​ເທັນ​ນິດ​ຊາຍ ຈຳ­ນວນ 5 ຄົນ ປະ­ກອບ​ມີ ອາ​ນັນ​ດາ ຄຳ​ພູ­ມີ ອາ​ນັນ​ດອນ ຄຳ​ພູ­ມີ ສົມ​ຊາຍ ວັນ­ນະ​ສັກ ໂຕ​ບີ້ ບຸນ​ສະ­ອາດ ແລະ ປະ­ລິນ­ຍາ ອິນ​ທະ­ລັງ​ສີ ສ່ວນ​ຄະ­ນະ​ນຳ ມີ​ທ່ານ ບຸນ​ທະ​ມາ­ລີ ຫຼວງ​ໂຄດ ຜູ້​ຈັດ­ການ ແລະ ທ່ານ ພູ​ແກ້ວ ພັນ​ນະ​ລັດ ຫົວ­ໜ້າ​ຄູ​ເຝິກ​ເຂົ້າ​ຮ່ວມ​ແຂ່ງ­ຂັນ ເພື່ອ​ຍາດ​ເອົາ​ປະ­ສົບ​ການ​ທີ່​ດີ ນຳ​ມາ​ພັດ­ທະ­ນາ ເພື່ອ​ຮັບ­ປະ­ກັນ​ໄດ້​ໃນ​ການ​ສ້າງ​ຜົນ­ງານ​ໃຫ້​ປະ­ເທດ​ຊາດ​ໃນ­ຕໍ່­ໜ້າ ແນວ­ໃດ​ກໍ​ດີ ໜ້າ​ເສຍ­ດາຍ ບໍ່​ໄດ້​ສົ່ງ​ນັກ­ກີ­ລາ​ຍິງ​ເຂົ້າ​ຮ່ວມ​ແຂ່ງ­ຂັນ ຍ້ອນ​ວ່າ​ງົບ­ປະ­ມານ​ບໍ່​ພຽງ­ພໍ ຈຶ່ງ​ສົ່ງ​ພຽງ​ນັກ­ກີ­ລາ​ຊາຍ ແລະ ໄດ້​ຮັບ​ການ​ສະ­ໜັບ­ສະ­ໜູນ​ຫຼັກ​ຈາກ ບໍ­ລິ­ສັດ ບອນ​ທູ​ບີ.

    ເຖິງ​ວ່າ​ໄລ­ຍະ​ນີ້ ການ​ແຜ່​ລະ­ບາດ​ພະ­ຍາດ​ໂຄ​ວິດ-19 ຈະ​ມາ​ແຮງ​ກໍ​ຕາມ ການ​ແຂ່ງ­ຂັນ​ກີ­ລາ​ຊັອບ​ເທັນ​ນິດ ຊີງ​ແຊັມ​ໂລກ 2020 ທີ່​ແຂວງ​ຊົນ​ບູ​ລີ ແມ່ນ​ຢູ່​ບ່ອນ​ໂລ່ງ​ແຈ້ງ ແລະ ເປັນ​ຈຸດ​ປອດ​ພະ­ຍາດ​ດັ່ງ­ກ່າວ ແຕ່​ກໍ​ບໍ່​ໄດ້​ປະ­ໝາດ ໄດ້​ໂອ້​ລົມ​ນັກ­ກີ­ລາ​ສະ­ເໝີ​ໃຫ້​ເຂົາ­ເຈົ້າ​ບໍ່​ໄປ​ຢູ່​ຈຸດ​ຊຸມ​ຊົນ​ຫຼາຍ ແລະ ເວ­ລາ​ຂຶ້ນ-ລົງ​ຍົນ ກໍ​ໃຫ້​ພະ­ຍາ­ຍາມ​ປ້ອງ​ກັນ​ດ້ວຍ​ການ​ອັດ​ປາກ​ເປັນ​ຫຼັກ ຫຼັງ​ຈາກ​ສິ້ນ​ສຸດ​ການ​ແຂ່ງ­ຂັນ​ໃນ​ຄັ້ງ​ນີ້ ທາງ​ສະ­ຫະ­ພັນ​ຊັອບ​ເທັນ​ນິດ​ພວກ​ເຮົາ ຍັງ​ຈະ​ສືບ­ຕໍ່​ນຳ​ເອົາ​ບົດ­ຮຽນ​ທີ່​ເຂົ້າ​ຮ່ວມ​ໃຫ້​ຄູ​ເຝິກ ໄດ້​ຖອດ​ຖອນ​ບົດ­ຮຽນ​ໃຫ້​ແກ່​ນັກ­ກີ­ລາ ຈຸດ​ໃດ​ທີ່​ຍັງ​ເປັນ​ຂໍ້​ຄົງ​ຂ້າງ ກໍ​ຈະ​ແກ້​ໄຂ້​ຈຸດ​ນັ້ນ ເພື່ອ​ກຽມ​ຄວາມ​ຮ່ວມ​ສ້າງ​ຜົນ­ງານ​ໃນ​ການ​ແຂ່ງ­ຂັນ​ລາຍ­ການ​ຕໍ່​ໄປ​ຕື່ມ​ອີກ.

    ການ​ແຂ່ງ­ຂັນ​ດັ່ງ­ກ່າວ ມີ​ນັກ­ກີ­ລາ​ຈາກ 4 ຊາດ ເຂົ້າ​ຮ່ວມ​ແຂ່ງ­ຂັນ ປະ­ກອບ​ມີ ເຈົ້າ­ພາບ ໄທ ມາ​ເລ​ເຊຍ ອິນ​ໂດ​ເນ​ເຊຍ ແລະ ສປປ ລາວ ໃນ​ນັ້ນ ມີ​ການ​ຊີງ​ໄຊ​ກັນ​ທັງ​ໝົດ 6 ລາຍ­ການ ຄື ປະ­ເພດ​ດ່ຽວ​ຍິງ-ຊາຍ ທີມ​ຄູ່​ຍິງ-ຊາຍ ແລະ ທີມ​ຊຸດ​ຍິງ-ຊາຍ ແຕ່​ສະ­ເພາະ​ລາວ ສົ່ງ​ພຽງ 3 ລາຍ­ການ ກໍ​ຄື ດ່ຽວ ທີມ​ຄູ່ ແລະ ທີມ​ຊຸດ ປະ­ເພດ​ຊາຍ​ເທົ່າ​ນັ້ນ.

ຂ່າວທີ່ກ່ຽວຂ້ອງ