ພູເບ້ຍມາຍນິງ ມອບເງິນປັນຜົນໃຫ້ລັດຖະບານ

1.850 12 ມ.ນ. 2020 ຂ່າວໜ້າ​ໜຶ່ງ
ພູເບ້ຍມາຍນິງ ມອບເງິນປັນຜົນໃຫ້ລັດຖະບານ

    ເມື່ອ​ບໍ່​ດົນ​ມາ​ນີ້ ບໍ­ລິ­ສັດ ພູ​ເບ້ຍ ມາຍ​ນິງ ໄດ້​ມອບ​ເງິນ​ປັນ​ຜົນ​ປະ­ຈຳ​ປີ 2019 ທັງ​ໝົດ 21 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 186,63 ຕື້​ກີບ ໃຫ້​ລັດ­ຖະ­ບານ​ລາວ ໃນ​ນາມ​ຜູ້​ຖື​ຮຸ້ນ ເຊິ່ງ​ເປັນ​ການ​ປະ­ກອບ­ສ່ວນ​ດ້ານ​ການ​ເງິນ ທີ່​ສຳ­ຄັນ​ຢ່າງ​ຕໍ່​ເນື່ອງ​ໃຫ້​ລັດ­ຖະ­ບານ ນອກ­ຈາກ​ເງິນ​ປັນ​ຜົນ ຍັງ​ມີ​ການ​ຖອກ​ພັນ­ທະ​ອື່ນໆ ເຊັ່ນ: ຊັບ­ພະ­ຍາ­ກອນ​ແຮ່​ທາດ ອາ­ກອນ​ກ່ຽວ­ຂ້ອງ ແລະ ຄ່າ​ທຳ­ນຽມ​ນຳ​ເຂົ້າ ໃນ​ເດືອນ​ສິງ­ຫາ ປີ 2012 ລັດ­ຖະ­ບານ​ໄດ້​ກາຍ­ເປັນ​ຜູ້​ຖື​ຮຸ້ນ 10% ໃນ​ບໍ­ລິ­ສັດ ພູ​ເບ້ຍ​ມາຍ​ນິງ ມາ​ເຖິງ​ປີ 2017 ລັດ­ຖະ­ບານ​ໄດ້​ຖອກ​ຮຸ້ນ 29 ລ້ານ​ໂດ​ລາ​ຄົບ​ຖ້ວນ ດ້ວຍ​ເງິນ​ປັນ​ຜົນ​ທີ່​ບໍ­ລິ­ສັດ ພູ​ເບ້ຍ​ມາຍ​ນິງ ໄດ້​ມອບ​ໃຫ້​ໄລ­ຍະ​ປີ​ດັ່ງ­ກ່າວ.

    ຮອດ​ທ້າຍ​ປີ 2017 ພາຍ­ຫຼັງ​ການ​ຖອກ​ຮຸ້ນ​ສຳ­ເລັດ​ຄົບ​ຖ້ວນ ບໍ­ລິ­ສັດ ພູ​ເບ້ຍ​ມາຍ​ນິງ ໄດ້​ມອບ​ເງິນ​ປັນ​ຜົນ​ເປັນ​ເງິນ­ສົດ​ໃຫ້​ລັດ­ຖະ­ບານ​ໂດຍ​ກົງ ດັ່ງ­ນັ້ນ​ນັບ​ແຕ່​ປີ 2012 ເປັນ­ຕົ້ນ​ມາ ເງິນ​ປັນ​ຜົນ​ສະ​ສົມ​ທີ່​ບໍ­ລິ­ສັດ ມອບ​ໃຫ້​ລັດ­ຖະ­ບານ​ມີ​ມູນ​ຄ່າ​ຫຼາຍ​ກວ່າ 58 ລ້ານ​ໂດ​ລາ.

    ທ່ານ ຈັນ​ເພັງ ບຸນ​ນະ​ຜົນ ປະ­ທານ​ບໍ­ລິ­ສັດ ພູ​ເບ້ຍ​ມາຍ​ນິງ ກ່າວ​ວ່າ: ເງິນ​ປັນ​ຜົນ​ດັ່ງ­ກ່າວ​ສະ­ແດງ​ເຖິງ​ພັນ­ທະ​ຂອງ​ບໍ­ລິ­ສັດ ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ​ຂອງ​ລາວ ເຖິງ​ວ່າ­ການ​ຜະ­ລິດ​ຄົງ​ທີ່ ແລະ ຄ່າ​ໃຊ້​ຈ່າຍ​ໃນ​ການ​ຜະ­ລິດ​ໄດ້​ຫຼຸດ​ລົງ​ຢູ່​ໂຮງ­ງານ​ຜະ­ລິດ​ທອງ-ຄຳ ພູ​ຄຳ ແລະ ໂຮງ­ງານ​ຜະ­ລິດ​ຄຳ​ບ້ານ​ຫ້ວຍ​ເງິນ ໃນ​ປີ 2019 ບໍ­ລິ­ສັດ​ຍັງ​ສາ­ມາດ​ມອບ​ເງິນ​ປັນ​ຜົນ​ໃນ​ຈຳ­ນວນ​ດັ່ງ­ກ່າວ ໃຫ້​ລັດ­ຖະ­ບານ​ຢ່າງ​ເປັນ​ປົກ­ກະ­ຕິ ເຊິ່ງ​ໄດ້​ສະ­ແດງ​ອອກ​ເຖິງ​ຄວາມ​ມຸ່ງ​ໝັ້ນ ເພື່ອ​ສືບ­ຕໍ່​ປະ­ກອບ­ສ່ວນ​ເຂົ້າ​ລາຍ​ຮັບ ສຳ­ລັບ​ລັດ­ຖະ­ບານ​ລາວ ແລະ ເຊື່ອ​ໝັ້ນ​ວ່າ​ປີ 2020 ຈະ​ເປັນ​ອີກ​ປີ​ທີ່​ບໍ­ລິ­ສັດ ສາ­ມາດ​ປະ­ກອບ­ສ່ວນ​ຕໍ່​ເສດ­ຖະ­ກິດ-ສັງ­ຄົມ​ໃຫ້​ລັດ ແລະ ປະ­ຊາ­ຊົນ​ລາວ​ໄດ້​ດີ​ຍິ່ງ​ຂຶ້ນ.

ຂ່າວທີ່ກ່ຽວຂ້ອງ