ເພີ່ມມາດຕະການປ້ອງກັນພະຍາດ COVID-19 ຢ່າງເຂັ້ມງວດ

1.949 11 ມ.ນ. 2020 ຂ່າວໜ້າ​ໜຶ່ງ

    ຄະ­ນະ​ສະ­ເພາະ​ກິດ ເພື່ອ​ປ້ອງ​ກັນ​ຄວບ​ຄຸມ ແລະ ແກ້​ໄຂ​ການ​ລະ­ບາດ​ຂອງ​ພະ­ຍາດ​ອັກ­ເສບ​ປອດ ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ (COVID-19) ຈັດ​ກອງ​ປະ­ຊຸມ​ເພື່ອ​ປຶກ­ສາ​ຫາ­ລື​ກ່ຽວ​ກັບ​ມາດ​ຕະ­ການ​ໃນ​ການ​ປ້ອງ​ກັນ ແລະ ຄວບ​ຄຸມ­ພະ​ຍາດ​ດັ່ງ­ກ່າວ ຂຶ້ນ​ວັນ​ທີ 6 ມີ­ນາ 2020 ຢູ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ​ໂດຍ​ເປັນ​ປະ­ທານ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ຫົວ­ໜ້າ​ຄະ­ນະ​ສະ­ເພາະ​ກິດ ເພື່ອ​ປ້ອງ​ກັນ​ຄວບ​ຄຸມ ແລະ ແກ້​ໄຂ​ການ​ລະ­ບາດ​ຂອງ​ພະ­ຍາດ COVID-19 ມີ​ຄະ­ນະ​ສະ­ເພາະ​ກິດ ແລະ ກອງ​ເລ­ຂາ ຮັບ­ຜິດ­ຊອບ​ວຽກ​ງານ​ດັ່ງ­ກ່າວ ເຂົ້າ​ຮ່ວມ.

    ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ຫົວ­ໜ້າ​ກອງ​ເລ­ຂາ​ຄະ­ນະ​ສະ­ເພາະ​ກິດ ເພື່ອ​ປ້ອງ​ກັນ​ຄວບ​ຄຸມ ແລະ ແກ້​ໄຂ ການ​ລະ­ບາດ​ຂອງ​ພະ­ຍາດ COVID-19 ກ່າວ​ວ່າ: ມາ​ຮອດ 6 ໂມງ​ວັນ​ທີ 4 ມີ­ນາ 2020 ທົ່ວ​ໂລກ​ມີ​ກໍ­ລະ­ນີ​ຢັ້ງ­ຢືນ​ຜູ້​ຕິດ­ເຊື້ອ​ພະ­ຍາດ COVID-19 ຈຳ­ນວນ95.308 ກໍ­ລະ­ນີ ເສຍ​ຊີ­ວິດ 3.285 ຄົນ ໃນ​ນີ້ ຫຼາຍ​ກວ່າ​ໝູ່​ຢູ່​ຈີນ 80.409 ກໍ­ລະ­ນີ ເສຍ​ຊີ­ວິດ 3.012 ຄົນ ອີ​ຕາ​ລີ 3.089 ກໍ­ລະ­ນີ ເສຍ​ຊີ­ວິດ 107 ຄົນ ອີ​ຣ່ານ 2.922 ກໍ­ລະ­ນີ ເສຍ​ຊີ­ວິດ 92 ຄົນ ສ ເກົາ­ຫຼີ 5.621 ກໍ­ລະ­ນີ ເສຍ​ຊີ­ວິດ 35 ຄົນ ຍີ່­ປຸ່ນ 331 ກໍ­ລະ­ນີ ເສຍ​ຊີ­ວິດ 6 ຄົນ ແລະ ປະ­ເທດ​ອື່ນໆ ລວມ 79 ປະ­ເທດ ສະ­ເພາະ 10 ປະ­ເທດ​ສະ­ມາ­ຊິກ​ອາ​ຊຽນ ມີ 7 ປະ­ເທດ ມີ​ກໍ­ລະ­ນີ​ຢັ້ງ­ຢືນ​ຜູ້​ຕິດ­ເຊື້ອ​ຄື: ສິງ­ກະ­ໂປ 110 ກໍ­ລະ­ນີ ມາ​ເລ​ເຊຍ 50 ກໍ­ລະ­ນີ ໄທ 43 ກໍ­ລະ­ນີ (ເສຍ​ຊີ­ວິດ 1 ຄົນ) ຫວຽດ­ນາມ 16 ກໍ­ລະ­ນີ ຟີ​ລິບ​ປິນ 3 ກໍ­ລະ­ນີ (ເສຍ​ຊີ­ວິດ 1 ຄົນ) ອິນ​ໂດ​ເນ​ເຊຍ 2 ກໍ­ລະ­ນີ ກຳ­ປູ­ເຈຍ 1 ກໍ­ລະ­ນີ ສະ­ເພາະ ສປປ ລາວ ພົບ​ກໍ­ລະ­ນີ​ສົງ­ໄສ 53 ກໍ­ລະ­ນີ ເຊິ່ງ​ໄດ້​ນຳ​ເອົາ​ຕົວ­ຢ່າງ​ໄປ​ກວດ ແລະ ວິ­ເຄາະ​ຫາ​ເຊື້ອ​ພະ­ຍາດ​ບໍ່​ມີ​ເຊື້ອ​ພະ­ຍາດ COVID-19 ແຕ່​ລັດ­ຖະ­ບານ​ກໍ​ໄດ້​ດຳ­ເນີນ​ມາດ​ຕະ­ການ​ປ້ອງ​ກັນ ແລະ ກະ­ກຽມ​ຄວາມ​ພ້ອມ​ໃນ​ການ​ຕອບ​ໂຕ້​ພະ­ຍາດ​ດັ່ງ­ກ່າວ ເປັນ­ຕົ້ນ ມາດ​ຕະ­ການ​ເຝົ້າ​ລະ­ວັງ ການ​ປ້ອງ​ກັນ​ການ​ຕິດ­ເຊື້ອ ແລະ ຄຸ້ມ​ຄອງ​ກໍ­ລະ­ນີ ການ​ໂຄ­ສະ­ນາ​ເຜີຍ­ແຜ່​ໃຫ້​ຄວາມ​ຮູ້ ແລະ ການ​ສື່­ສານ​ເພື່ອ​ຫຼຸດ­ຜ່ອນ​ຄວາມ​ສ່ຽງ ການ​ປະ­ສານ​ງານ​ກັບ​ພາກ­ສ່ວນ​ທີ່​ກ່ຽວ­ຂ້ອງ ການ​ກະ­ກຽມ​ພື້ນ­ຖານ​ໂຄງ​ລ່າງ ແລະ ພະ­ລາ­ທິ­ການ ເພື່ອ​ຮັບ­ປະ­ກັນ​ໃຫ້­ການ​ປ້ອງ​ກັນ​ຄວບ​ຄຸມ ແລະ ແກ້​ໄຂ​ການ​ລະ­ບາດ​ຂອງ​ພະ­ຍາດ COVID-19 ນອກ​ນີ້ ທ່ານ​ຮອງ​ລັດ­ຖະ­ມົນ­ຕີ​ຍັງ​ໄດ້​ສະ­ເໜີ​ສິ່ງ​ທ້າ​ທາຍ ຄວາມ​ຫຍຸ້ງ­ຍາກ ແລະ ຂໍ້​ຈຳ­ກັດ​ບາງ​ດ້ານ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂອງ ສປປ ລາວ ຈາກ​ນັ້ນ ຜູ້​ເຂົ້າ​ຮ່ວມ​ກອງ​ປະ­ຊຸມ​ໄດ້​ປະ­ກອບ​ຄຳ​ຄິດ​ເຫັນ ແລະ ຍົກ​ບາງ​ບັນ­ຫາ​ມາ​ນຳ​ສະ­ເໜີ ໂດຍ​ສະ­ເພາະ ບັນ­ຫາ​ທີ່​ຕິດ​ພັນ​ກັບ​ຄວາມ​ຮັບ­ຜິດ­ຊອບ​ຂອງ​ຂະ­ແໜງ­ການ​ຂອງ​ຕົນ.

ຂ່າວທີ່ກ່ຽວຂ້ອງ