ລາວ-ຣັດເຊຍ ກຽມສະເຫຼີມສະຫຼອງ 60 ປີ ວັນສ້າງຕັ້ງສາຍພົວພັນການທູດ

1.961 11 ມ.ນ. 2020 ຂ່າວໜ້າ​ໜຶ່ງ

    ໂດຍ​ປະ­ຕິ­ບັດ​ຕາມ​ບົດ​ບັນ­ທຶກ​ຄວາມ​ເຂົ້າ­ໃຈ ລະ­ຫວ່າງ​ກະ­ຊວງ​ການ​ຕ່າງ­ປະ­ເທດ ສປປ ລາວ ແລະ ກະ­ຊວງ​ການ​ຕ່າງ­ປະ­ເທດ ສ ຣັດ​ເຊຍ ໃນ​ວັນ​ທີ 3-4 ມີ­ນາ 2020 ທີ່​ນະ­ຄອນ­ຫຼວງ​ມົດ​ສະ​ກູ ໄດ້​ຈັດ​ກອງ​ປະ­ຊຸມ​ປຶກ­ສາ​ຫາ­ລື​ດ້ານ​ການ­ເມືອງ​ລະ­ຫວ່າງ​ສອງ​ກະ­ຊວງ​ການ​ຕ່າງ­ປະ­ເທດ​ລາວ-ຣັດ​ເຊຍ ຂຶ້ນ ເຊິ່ງ​ຄະ­ນະ​ຜູ້​ແທນ​ຝ່າຍ​ລາວ​ນຳ​ໂດຍ​ທ່ານ ທອງ​ສະ­ຫວັນ ພົມ­ວິ­ຫານ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ຄະ­ນະ​ຜູ້​ແທນ​ຝ່າຍ​ຣັດ​ເຊຍ​ນຳ​ໂດຍ​ທ່ານ ອີ​ກໍ​ຣ ມາ​ກູ​ລົບ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ.

    ກອງ​ປະ­ຊຸມ​ຄັ້ງ​ນີ້ ສອງ​ຝ່າຍ​ໄດ້​ປຶກ­ສາ​ຫາ­ລື ແລະ ລົງ​ເລິກ ແລກ­ປ່ຽນ​ບັນ­ຫາ​ການ​ພົວ­ພັນ​ຮ່ວມ​ມື​ສອງ​ຝ່າຍ​ຢ່າງ­ຮອບ­ດ້ານ ແລະ ຕີ​ລາ­ຄາ​ການ​ພົວ­ພັນ​ລາວ-ຣັດ​ເຊຍ​ໃລ​ຍະ​ຜ່ານ​ມາ ເຫັນ​ວ່າ​ມີ​ທ່າ​ອ່ຽງ​ຂະ­ຫຍາຍ­ຕົວ​ດີ​ໃນ​ທຸກ​ດ້ານ ໃນ​ນັ້ນ​ອັນ​ພົ້ນ​ເດັ່ນ​ແມ່ນ​ການ​ແລກ­ປ່ຽນ​ການ​ຢ້ຽມ­ຢາມ ຂອງ​ຄະ­ນະ​ຜູ້​ແທນ​ຂອງ​ບັນ­ດາ​ຂະ­ແໜງ­ການ​ຕ່າງໆ ການ​ຮ່ວມ​ມື​ໃນ​ຂົງ­ເຂດ​ເຕັກ­ນິກ​ການ​ທະ­ຫານ ການ​ເກັບ​ກູ້​ລະ­ເບີດ​ບໍ່​ທັນ​ແຕກ​ຢູ່​ລາວ ການ​ສ້າງ​ຊັບ­ພະ­ຍາ­ກອນ​ມະ­ນຸດ ວຽກ​ງານ​ດ້ານ​ມະ­ນຸດ­ສະ­ທຳ ດ້ານ​ນິ­ຕິ​ກຳ ພະ­ລັງ­ງານ ແລະ ການ​ຮ່ວມ​ມື​ດ້ານ​ວຽກ​ງານ​ສື່​ມວນ​ຊົນ ນອກ​ນັ້ນ​ສອງ​ຝ່າຍ​ຍັງ​ໄດ້​ເປັນ​ເອ­ກະ​ພາບ​ກັນ​ກ່ຽວ​ກັບ​ທິດ​ທາງ ເພື່ອ​ສືບ­ຕໍ່​ຊຸກ­ຍູ້​ການ​ຮ່ວມ​ມື​ຂອງ​ບັນ­ດາ​ຂະ­ແໜງ­ການ​ໃຫ້​ຫຼາຍ​ຂຶ້ນ​ກວ່າ​ເກົ່າ ໃນ​ນັ້ນ ສຳ­ຄັນ​ຂົງ­ເຂດ​ເສດ­ຖະ­ກິດ-ການ​ຄ້າ ການ​ລົງ­ທຶນ ເຊິ່ງ​ຍັງ​ເປັນ​ຂົງ­ເຂດ​ທີ່​ຍັງ​ບໍ່​ພົ້ນ​ເດັ່ນ ຊຸກ­ຍູ້​ການ​ແລກ­ປ່ຽນ​ທາງ​ດ້ານ​ວັດ­ທະ­ນະ­ທຳ-ສັງ­ຄົມ ການ­ທ່ອງ­ທ່ຽວ ແລະ ການ​ໄປ­ມາ­ຫາ­ສູ່​ຂອງ​ປະ­ຊາ­ຊົນ​ສອງ​ຊາດ ພ້ອມ​ກັນ​ນັ້ນ ​ຍັງ​ໄດ້​ແລກ­ປ່ຽນ​ທັດ­ສະ­ນະ​ຮ່ວມ​ກັນ​ ກ່ຽວ​ກັບ​ບັນ­ຫາ​ສາ­ກົນ​ທີ່​ພົ້ນ​ເດັ່ນ ທີ່​ຕ່າງ​ຝ່າຍ​ມີ​ຄວາມ​ສົນ­ໃຈ​ໃນ​ຂອບ​ການ​ຮ່ວມ​ມື​ອາ​ຊຽນ ສະ­ຫະ​ປະ­ຊາ​ຊາດ ແລະ ການ​ແຜ່​ລະ­ບາດ​ຂອງ​ພະ­ຍາດ​ໂຄ​ວິດ-19.

    ສອງ​ຝ່າຍ​ເຫັນ​ວ່າ​ປີ 2020 ເປັນ​ປີ​ທີ່​ມີ​ຄວາມ​ໝາຍ​ສຳ­ຄັນ​ຕໍ່​ການ​ພົວ­ພັນ​ຮ່ວມ​ມື​ລາວ-ຣັດ​ເຊຍ ໂດຍ​ສະ­ເພາະ​ການ​ກະ­ກຽມ​ສະ­ເຫຼີມ­ສະ­ຫຼອງ 60 ປີ ສ້າງ­ຕັ້ງ​ສາຍ​ພົວ­ພັນ​ການ​ທູດ ແລະ ວັນ​ສ້າງ­ຕັ້ງ​ສະ­ມາ­ຄົມ​ມິດ­ຕະ­ພາບ​ຣັດ​ເຊຍ-ລາວ-ຣັດ​ເຊຍ ຄົບ­ຮອບ 55 ປີ ລວມ​ທັງ​ການ​ກະ­ກຽມ​ເຂົ້າ​ຮ່ວມ​ການ​ສະ­ເຫຼີມ­ສະ­ຫຼອງ 75 ປີ ແຫ່ງ​ໄຊ­ຊະ­ນະ​ປົກ​ປ້ອງ​ປິ­ຕຸ​ພູມ ຈະ​ຈັດ​ຂຶ້ນ​ວັນ​ທີ 9 ພຶດ­ສະ­ພາ 2020 ທີ່​ນະ­ຄອນ­ຫຼວງ​ມົດ​ສະ​ກູ.

ຂ່າວທີ່ກ່ຽວຂ້ອງ