ປຶ້ມແບບຮຽນຂັ້ນ ປ2 ສະບັບປັບປຸງໃໝ່ ຈະຖືກນຳໃຊ້ສົກຮຽນໜ້າ

1.896 11 ມ.ນ. 2020 ຂ່າວໜ້າ​ໜຶ່ງ
ປຶ້ມແບບຮຽນຂັ້ນ ປ2 ສະບັບປັບປຸງໃໝ່ ຈະຖືກນຳໃຊ້ສົກຮຽນໜ້າ

    ເນື່ອງ​ໃນ​ໂອ­ກາດ​ວັນ​ແມ່­ຍິງ​ສາ­ກົນ ຄົບ­ຮອບ 110 ປີ ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ຮ່ວມ​ກັບ​ສະ­ຖານ­ທູດ​ອົດ​ສະ​ຕຣາ​ລີ ຈັດ​ກິດ­ຈະ­ກຳ​ຢ້ຽມ​ຊົມ​ສາງ​ເກັບ​ຮັກ­ສາ​ສື່​ການ​ຮຽນ-ການ​ສອນ​ຂອງ​ກະ­ຊວງ ສສກ ໃນ​ວັນ​ທີ 6 ມີ­ນາ 2020 ທີ່​ສາງ​ຫຼັກ 3 ເພື່ອ​ເບິ່ງ​ຂັ້ນ​ຕອນ​ການ​ຫຸ້ມ​ຫໍ່ ສື່​ການ​ຮຽນ-ການ​ສອນ ສະ­ບັບ​ປັບ­ປຸງ​ໃໝ່ ສຳ­ລັບ​ຂັ້ນ ປ2 ມີ​ທ່ານ​ນາງ ຂັນ​ທະ​ລີ ສິ​ຣິ​ພົງ­ພັນ ຮອງ​ລັດ­ຖະ­ມົນ­ຕີ​ກະ­ຊວງ ສສກ ແລະ ທ່ານ ຈອງ​ເບີ​ນາດ​ຄາ​ຣາດ​ໂກ ເອກ​ອັກ​ຄະ​ລັດ​ຖະ​ທູດ​ອົດ​ສະ​ຕຣາ​ລີ ປະ­ຈຳ​ລາວ ພ້ອມ​ທັງ​ໄດ້​ເຊີນ​ຄູ​ຍິງ 3 ທ່ານ​ຄື: ທ່ານ​ນາງ ມີ​ຕູ​ເລ​ເຊີ ທ່ານ​ນາງ ແກ້ວ​ລາວ​ລີ່ ແລະ ທ່ານ​ນາງ ບົວ​ລີ ແກ້ວ​ວິ­ໄລ ຄູ​ທັງ 3 ຄົນ​ທີ່​ມາ​ຈາກ​ເມືອງ​ສິງ ແຂວງ​ຫຼວງ​ນ້ຳ​ທາ ທັງ​ສາມ​ແມ່ນ​ຄູ​ຊົນ­ເຜົ່າ​ອາ​ຄາ ພ້ອມ​ດ້ວຍ​ພະ­ນັກ­ງານ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ນັບ​ແຕ່​ປີ 2015 ກະ­ຊວງ ສສກ ໂດຍ​ການ​ສະ­ໜັບ­ສະ­ໜູນ​ຈາກ​ສະ­ຖານ­ທູດ​ອົດ​ສະ​ຕຣາ​ລີ ສະ­ຫະ­ພາບ​ເອີ​ຣົບ ແລະ USAID ໄດ້​ພັດ­ທະ­ນາ​ຫຼັກ­ສູດ​ຊັ້ນ​ປະ­ຖົມ​ແຫ່ງ​ຊາດ ສະ­ບັບ​ປັບ­ປຸງ​ໃໝ່​ຄຽງ​ຄູ່​ກັບ​ສື່​ການ​ຮຽນ-ການ​ສອນ ສະ­ບັບ​ປັບ­ປຸງ​ໃໝ່​ການ­ຈັດ­ຕັ້ງ​ປະ­ຕິ­ບັດ​ຫຼັກ­ສູດ​ຊັ້ນ​ປະ­ຖົມ​ສຶກ​ສາ​ແຫ່ງ​ຊາດ​ສະ­ບັບ​ປັບ­ປຸງ​ໃໝ່​ໃນ​ຫ້ອງ​ຮຽນ​ໄດ້​ເລີ່ມ​ນຳ​ໃຊ້​ໃນ​ເດືອນ​ກັນ­ຍາ 2019 ໃນ​ຂັ້ນ ປ1 ແລະ ຈະ​ປັບ­ປຸງ​ຈົນ​ຮອດ​ຂັ້ນ ປ5 ສົກ­ຮຽນ 2023-2024 ເພື່ອ​ຮັບ­ປະ­ກັນ​ວ່າ​ຄູ​ຮັບ​ຮູ້​ກ່ຽວ​ກັບ​ສື່​ການ​ຮຽນ​ການ​ສອນ​ສະ­ບັບ​ປັບ­ປຸງ​ໃໝ່ ແລະ ຮູ້​ນຳ​ໃຊ້​ສື່​ການ​ຮຽນ-ການ​ສອນ​ໄດ້​ມີ​ການ​ສ້າງ​ແຜນ­ການ​ເຝິກ­ອົບ­ຮົມ​ບຳ­ລຸງ​ຄູ ແລະ ຈັດ​ຕັ້ງ​ປະ­ຕິ­ບັດ​ໂດຍ​ກະ­ຊວງ ສສກ ໄດ້​ຮັບ​ການ​ສະ­ໜັບ­ສະ­ໜູນ​ໂດຍ​ລັດ­ຖະ­ບານ​ອົດ​ສະ​ຕຣາ​ລີ ແລະ ສະ­ຫະ­ພາບ​ເອີ​ຣົບ.

    ສຳ­ລັບ​ປື້ມ​ນິ­ທານ 159.205 ຫົວ ປຶ້ມ​ອ່ານ​ເສີມ 683.645 ຫົວ ແລະ ຮູບ​ພາບ​ທີ່​ມີ​ຫຼາຍ​ເຫດ­ການ 18.730 ຮູບ​ພາບ ຈະ​ຖືກ​ຫຸ້ມ​ຫໍ່​ໃນ​ກ່ອງ​ອຸ­ປະ­ກອນ​ການ​ສອນ​ຂອງ​ຄູ ແລະ ຈະ​ນຳ​ສົ່ງ​ໃຫ້​ຫ້ອງ​ຮຽນ​ຂັ້ນ ປ2 ທົ່ວ​ປະ­ເທດ​ກ່ອນ​ມື້​ເປີດ​ສົກ­ຮຽນ​ໃໝ່​ສົກ­ຮຽນ 2020–2021 ແລະ ເດືອນ​ເມ­ສາ 2020 ປຶ້ມ​ແບບ­ຮຽນ​ຂັ້ນ ປ2 ສະ­ບັບ​ປັບ­ປຸງ​ໃໝ່ 3 ວິ­ຊາ ແລະ ຄູ່​ມື​ຄູ 6 ວິ­ຊາ ຈະ​ຖືກ​ນຳ​ສົ່ງ​ມາ​ສາງ​ເພື່ອ​ຫຸ້ມ​ຫໍ່ ພາຍ­ຫຼັງ​ຫຸ້ມ​ຫໍ່​ແລ້ວ​ສື່​ການ​ຮຽນ-ການ​ສອນ​ນີ້ ຈະ​ຖືກ​ນຳ​ສົ່ງ​ໄປ​ຍັງ 148 ເມືອງ ແລະ ເມືອງ​ຈະ​ປະ­ສານ​ການ­ແຈກ­ຢາຍ​ຫາ​ໂຮງ­ຮຽນ​ໃນ​ທົ່ວ​ປະ­ເທດ ແລະ ນີ້​ເປັນ​ບາດ­ກ້າວ​ໃຫຍ່​ທຳ​ອິດ​ຂອງ​ປຶ້ມ​ສະ­ບັບ​ປັບ­ປຸງ​ໃໝ່​ ເພື່ອ​ສົ່ງ​ໄປ​ໃຫ້​ນັກ­ຮຽນ​ຂັ້ນ ປ2.

    ປີ 2019 ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ລັດ­ຖະ­ບານ​ອົດ​ສະ​ຕຣາ​ລີ ແລະ ສະ­ຫະ­ພາບ​ເອີ​ຣົບ ສາງ​ສ່ວນ​ໜຶ່ງ​ໄດ້​ຮັບ​ການ​ສ້ອມ­ແປງ​ປັບ­ປຸງ​ໃໝ່​ຄືນ​ໂດຍ​ການ​ປັບ­ປຸງ​ລະ­ບົບ​ໄຟ­ຟ້າ​ໃສ່​ດອກ­ໄຟ​ໃໝ່​ຊັ້ນ​ເກັບ​ເຄື່ອງ ຕັ່ງ​ນັ່ງ​ເຮັດ​ວຽກ ແລະ ປູ​ພື້ນ​ທີ່​ກັນ​ນ້ຳ​ໃໝ່​ດ້ວຍ​ງົບ­ປະ­ມານ 48.500 ໂດ​ລາ​ອົດ​ສະ​ຕຣາ​ລີ ຫຼື ປະ­ມານ 284 ລ້ານ​ກີບ ການ​ປັບ­ປຸງ​ສາງ​ໃໝ່​ນີ້ ເພື່ອ​ເປັນ​ການ​ກະ­ກຽມ​ສະ­ຖານ­ທີ່​ໃນ​ການ​ຫຸ້ມ​ຫໍ່​ສື່​ການ​ຮຽນ-ການ​ສອນ​ສຳ­ລັບ​ຫຼັກ­ສູດ​ຊັ້ນ​ປະ­ຖົມ​ສຶກ​ສາ​ສະ­ບັບ​ປັບ­ປຸງ​ໃໝ່.

ຂ່າວທີ່ກ່ຽວຂ້ອງ