ຍີ່ປຸ່ນ ຊ່ວຍເຫຼືອໂຄງການສຶກສາຄວາມສ່ຽງ ຂອງລະເບີດບໍ່ທັນແຕກ

1.861 11 ມ.ນ. 2020 ຂ່າວໜ້າ​ໜຶ່ງ
ຍີ່ປຸ່ນ ຊ່ວຍເຫຼືອໂຄງການສຶກສາຄວາມສ່ຽງ ຂອງລະເບີດບໍ່ທັນແຕກ

    ລັດ­ຖະ­ບານ​ຍີ່­ປຸ່ນ ໄດ້​ໃຫ້­ການ​ຊ່ວຍ­ເຫຼືອ​ລ້າ 213.927 ໂດ​ລາ​ສະ­ຫະ­ລັດ ຫຼື ປະ­ມານ 1,9 ຕື້​ກີບ​ເພື່ອ​ຈັດ​ຕັ້ງ​ປະ­ຕິ­ບັດ​ໂຄງ­ການ​ສຶກ​ສາ​ຄວາມ​ສ່ຽງ ຂອງ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ​ຢູ່ ສປປ ລາວ ໃນ​ປາງ​ສົງ­ຄາມ ພິ­ທີ​ເຊັນ​ສັນ­ຍາ​ໂຄງ­ການ​ຊ່ວຍ­ເຫຼືອ​ລ້າ​ໄດ້​ຈັດ​ຂຶ້ນ​ວັນ​ທີ 5 ມີ­ນາ ຜ່ານ​ມາ ທີ່​ສະ­ຖານ­ທູດ​ຍີ່­ປຸ່ນ​ປະ­ຈຳ​ລາວ ຮ່ວມ​ລົງ​ນາມ​ລະ­ຫວ່າງ ທ່ານ ທາ​ເກ​ວາ​ກະ ເຄ​ໂຊ ເອກ​ອັກ­ຄະ­ລາ­ຊະ­ທູດ​ຢີ່​ປຸ່ນ ປະ­ຈຳ​ລາວ ແລະ ທ່ານ ອິ​ຊູ​ມິ ໄຕ ຜູ້​ຈັດ­ການ​ອົງ­ການ​ຟື້ນ​ຟູ​ວິ­ທະ­ຍາ​ການ​ໂລກ ແຫ່ງ​ປະ­ເທດ​ຍີ່­ປຸ່ນ (Terra Renaissance) ເຊິ່ງ​ເປັນ​ອົງ­ການ​ບໍ່​ຫວັງ​ຜົນ​ກຳ­ໄລ​ຈາກ​ປະ­ເທດ​ຍີ່­ປຸ່ນ ທີ່​ໄດ້​ລິ​ເລີ່ມ ແລະ ຈັດ​ຕັ້ງ​ປະ­ຕິ­ບັດ​ໂຄງ­ການ​ດັ່ງ­ກ່າວ ການ​ຕໍ່​ສັນ­ຍາ​ການ​ຊ່ວຍ­ເຫຼືອ​ລ້າ​ຄັ້ງ​ນີ້ ຈະ​ໃຫ້­ການ​ສະ­ໜັບ­ສະ­ໜູນ​ກິດ­ຈະ­ກຳ​ໃນ​ປີ​ທຳ​ອິດ​ຂອງ​ໂຄງ­ການ​ທີ່​ມີ​ອາ­ຍຸ 3 ປີ.

    ໂຄງ­ການ​ມີ​ເປົ້າ​ໝາຍ​ທີ່​ຈະ​ເຮັດ​ໃຫ້​ເຍົາ­ວະ​ຊົນ ສາ­ມາດ​ຫຼີກ​ໜີ​ການ​ປະ­ສົບ​ອຸ­ບັດ­ເຫດ​ຈາກ​ລະ­ເບີດ​ທີ່​ຍັງ​ບໍ່​ທັນ​ແຕກ ເພື່ອ​ທີ່​ວ່າ​ຕົວ​ເຂົາ​ເອງ​ຈະ​ມີ​ໂອ­ກາດ ໄດ້​ຮັບ​ເອົາ​ການ​ສຶກ​ສາ​ລະ­ດັບ​ສູງ​ໃນ​ອະ­ນາ­ຄົດ ນອກ​ນີ້ ໂຄງ­ການ​ຍັງ​ຈະ​ພະ­ຍາ­ຍາມ​ຊອກ​ຫາ​ແຫຼ່ງ​ລາຍ​ຮັບ ໃຫ້​ແກ່​ຜູ້​ທີ່​ມີ​ຄວາມ​ອ່ອນ​ໄຫວ​ຕໍ່​ເສດ­ຖະ­ກິດ-ສັງ­ຄົມ ຜ່ານ​ການ​ຈັດ­ການ​ເຝິກ­ອົບ­ຮົມ​ວິ­ຊາ​ຊີບ​ທີ່​ຈຳ­ເປັນ​ຕ້ອງ​ມີ​ທັກ​ສະ​ຂັ້ນ​ສູງ​ໃຫ້​ແກ່​ພວກ​ເຂົາ.

    ອົງ­ການ Terra Renaissance ໄດ້​ຮັບ​ມື​ກັບ​ບັນ­ຫາ​ລະ­ເບີດ ທະ­ຫານ ເຍົາ­ວະ​ຊົນ ອາ­ວຸດ​ຂະ­ໜາດ​ນ້ອຍ ແລະ ເບົາ ແລະ ການ​ສຶກ​ສາ​ເລື່ອງ​ສັນ­ຕິ­ພາບ ເພື່ອ​ເຮັດ​ໃຫ້​ແນວ​ຄິດ “ການ​ນຳ​ສັນ­ຕິ​ມາ­ສູ່​ໂລກ” ປາ­ກົດ​ຜົນ​ເປັນ​ຈິງ.

ຂ່າວທີ່ກ່ຽວຂ້ອງ