ຍົກລະດັບດ່ານປະເພນີໜອງດາ ແລະ ຈຸດຜ່ອນປົນທາງການຄ້າບ້ານໝໍ້

1.891 11 ມ.ນ. 2020 ຂ່າວໜ້າ​ໜຶ່ງ
ຍົກລະດັບດ່ານປະເພນີໜອງດາ ແລະ ຈຸດຜ່ອນປົນທາງການຄ້າບ້ານໝໍ້

    ດ່ານ​ປະ­ເພ­ນີ​ໜອງ​ດາ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ (ນວ) ແລະ ຈຸດ​ຜ່ອນ​ປົນ​ທາງ​ການ​ຄ້າ​ບ້ານ​ໝໍ້ ເມືອງ​ສີ​ຊຽງ​ໃໝ່ ແຂວງ​ໜອງ​ຄາຍ ເພີ່ມ​ວັນ​ເປີດ​ດ່ານ​ຈາກ 3 ວັນ​ຕໍ່​ອາ­ທິດ ເປັນ 6 ວັນ​ຕໍ່​ອາ­ທິດ (ວັນ​ຈັນ ຫາ ວັນ​ເສົາ) ເພື່ອ​ຕອບ​ສະ­ໜອງ​ຄວາມ​ຕ້ອງ­ການ ແລະ ອຳ­ນວຍ​ຄວາມ​ສະ­ດວກ​ໃນ​ການ​ໄປ­ມາ­ຫາ­ສູ່ ກໍ​ຄື ແລກ­ປ່ຽນ​ຊື້-ຂາຍ​ສິນ­ຄ້າ ທີ່​ນັບ​ມື້​ມີ​ການ​ເພີ່ມ​ຂຶ້ນ​ລະ­ຫວ່າງ​ສອງ​ຝ່າຍ ກໍ​ຄື ສອງ​ປະ­ເທດ​ລາວ-ໄທ ເຊິ່ງ​ພິ­ທີ​ໄດ້​ຈັດ​ຂຶ້ນ​ວັນ​ທີ 7 ມີ­ນາ 2020 ມີ​ທ່ານ ຄຳ​ພັນ ມາ­ລາ​ບັນ­ດິດ ຄະ­ນະ​ປະ­ຈຳ​ພັກ ນວ ທີ່​ປຶກ­ສາ​ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ ນວ ທ່ານ ວິ­ລະ​ສັກ ນາມ​ມຸນ­ຕີ ເຈົ້າ­ເມືອງ​ສີ​ໂຄດ​ຕະ­ບອງ ທ່ານ ເດດ​ມົນ­ຕີ ຜິດ​ເຫຼືອງ ຮັກ­ສາ​ການ​ເຈົ້າ­ເມືອງ​ສີ​ຊຽງ​ໃໝ່ ພ້ອມ​ດ້ວຍ​ຄະ­ນະ​ກຳ­ມະ­ການ​ຄົ້ນ­ຄວ້າ​ປັບ­ປຸງ​ດ່ານ​ຊາຍ​ແດນ​ທ້ອງ­ຖິ່ນ ແລະ ດ່ານ​ປະ­ເພ­ນີ ນວ ອະ­ນຸ​ກຳ­ມະ­ການ​ຂັ້ນ​ເມືອງ ແລະ ພາກ­ສ່ວນ​ກ່ຽວ­ຂ້ອງ​ສອງ​ຝ່າຍ​ເຂົ້າ​ຮ່ວມ.

    ທ່ານ ສົມ​ຊາຍ ແສງ​ບັນ­ດິດ ຫົວ­ໜ້າ​ຫ້ອງ​ວ່າ­ການ​ປົກ­ຄອງ​ເມືອງ​ສີ​ໂຄດ​ຕະ­ບອງ ກ່າວ​ວ່າ: ດ່ານ​ປະ­ເພ­ນີ​ໜອງ​ດາ ແລະ ຈຸດ​ຜ່ອນ​ປົນ​ທາງ​ການ​ຄ້າ​ບ້ານ​ໝໍ້ ເປີດ​ໃຫ້​ປະ­ຊາ­ຊົນ​ໄປ­ມາ­ຫາ­ສູ່ ແລະ ແລກ­ປ່ຽນ​ຊື້-ຂາຍ​ສິນ­ຄ້າ ແຕ່​ວັນ​ທີ 18 ມິ­ຖຸ­ນາ 2010 ເປັນ­ຕົ້ນ​ມາ ເຊິ່ງ​ເບື້ອງ​ຕົ້ນ​ໄດ້​ເປີດ 6 ວັນ​ຕໍ່​ອາ­ທິດ (ວັນ​ຈັນ ຫາ ວັນ​ເສົາ) ມາ​ຮອດ​ເດືອນ​ກໍ­ລະ­ກົດ 2016 ສອງ​ຝ່າຍ​ໄດ້​ເປັນ​ເອ­ກະ​ພາບ​ກັນ​ຫຼຸດ​ວັນ​ເປີດ​ດ່ານ​ຈາກ 6 ວັນ ເປັນ 3 ວັນ​ຕໍ່​ອາ­ທິດ (ອັງ­ຄານ ວັນ​ພະ­ຫັດ ແລະ ວັນ​ເສົາ) ເນື່ອງ​ຈາກ​ບຸ​ຄະ­ລາ​ກອນ ແລະ ສະ­ຖານ­ທີ່​ບໍ່​ພ້ອມ ໄລ­ຍະ​ຕໍ່​ມາ​ປະ­ຊາ­ຊົນ​ສອງ​ຝ່າຍ ນັບ​ມື້​ເພີ່ມ​ທະ­ວີ​ສາຍ​ພົວ­ພັນ​ຮ່ວມ​ມື​ຂຶ້ນ​ເລື້ອຍໆ ໂດຍ​ສະ­ເພາະ ການ​ຮ່ວມ​ມື​ດ້ານ​ການ​ຄ້າ ແລະ ການ­ທ່ອງ­ທ່ຽວ ດັ່ງ­ນັ້ນ ຄະ­ນະ​ອະ­ນຸ​ກຳ­ມະ­ການ ແລະ ກອງ​ເລ­ຂາ​ສອງ​ຝ່າຍ​ຈຶ່ງ​ໄດ້​ປຶກ­ສາ​ຫາ­ລື​ກັນ​ຫຼາຍ​ຄັ້ງ ແລະ ໄດ້​ຕົກ­ລົງ​ເພີ່ມ​ວັນ​ເປີດ​ດ່ານ​ຈາກ 3 ວັນ​ເປັນ 6 ວັນ​ຕໍ່​ອາ­ທິດ​ຄື­ເກົ່າ​ໃນ​ເບືອງ​ຕົ້ນ ເພື່ອ​ເປັນ​ການ​ຍົກ​ລະ­ດັບ​ຂຶ້ນ​ອີກ​ບາດ­ກ້າວ​ໜຶ່ງ ເພື່ອ​ຮອງ​ຮັບ​ການ​ຂະ­ຫຍາຍ­ຕົວ​ດ້ານ​ການ​ຄ້າ​ສອງ​ຝ່າຍ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ