ຊ່ວຍກັນປາບຍຸງລາຍ

1.866 11 ມ.ນ. 2020 ນານາສາລະ

    ຜູ້​ຂຽນ​ເຂົ້າ­ໃຈ​ວ່າ: ການ​ໃຊ້​ຊີ­ວິດ​ທຸກ​ມື້­ນີ້ ມີ​ຄວາມ​ຫຍຸ້ງ­ຍາກ​ຫຼາຍ​ປະ­ການ​ທີ່​ຄົນ​ເຮົາ​ຕ້ອງ​ໄດ້​ປ່ຽນ­ແປງ​ໂຕ​ເອງ ເພື່ອ​ຢູ່​ຮ່ວມ​ກັນ​ໃນ​ສັງ­ຄົມ​ໃຫ້​ມີ​ຄວາມ​ເອື້ອ­ເຟື້ອ ຮູ້­ຈັກ​ນ້ຳ­ໃຈ​ແບ່ງ­ປັນ ເສຍ­ສະ­ຫຼະ ເຊິ່ງ​ນ້ຳ­ໃຈ​ດັ່ງ­ກ່າວ​ຈະ​ເກີດ​ຂຶ້ນ​ໄດ້ ຍ່ອມ​ມີ​ຜູ້­ນຳ​ພາ​ເຮັດ​ເປັນ​ຕົວ­ຢ່າງ ແລະ ປູກ​ຈິດ​ສຳ­ນຶກ​ກັນ​ຢ່າງ​ກວ້າງ­ຂວາງ ແລະ ຮ່ວມ​ມື​ກັບ​ທຸກ​ພາກ­ສ່ວນ ເຊັ່ນ​ດຽວ​ກັບ​ຂະ​ບວນ​ການ​ຕ້ານ​ພະ­ຍາດ​ໄຂ້­ຍຸງ​ລາຍ ທີ່​ເປັນ​ໄພ​ອັນ­ຕະ­ລາຍ​ງຽບ​ພາກ​ຊີ­ວິດ​ຫຼາຍ​ຄົນ ການ​ກຽມ­ພ້ອມ ແລະ ຮ່ວມ​ມື​ກັນ​ທຸກ​ຝ່າຍ​ນັ້ນ ກໍ​ຄື ການ​ອະ­ນາ­ໄມ​ເຂດ​ບ້ານ​ເຮືອນ​ໃຫ້​ສະ­ອາດ

    ຜູ້​ຂຽນ​ໄດ້​ອ່ານ​ຂ່າວ​ໜັງ­ສື­ພິມ​ວຽງ​ຈັນ​ໃໝ່ 28 ກຸມ­ພາ ໄດ້​ຮູ້​ວ່າ: ສາ­ທາ­ລະ­ນະ​ສຸກ​ນະ­ຄອນ­ຫຼວງ ໄດ້​ຈັດ​ກອງ​ປະ­ຊຸມ​ຖອດ​ຖອນ​ບົດ­ຮຽນ ເຊິ່ງ​ມີ​ສະ­ຖິ­ຕິ​ແຈ້ງ​ໃຫ້​ຮູ້​ວ່າ: ປີ 2019 ທົ່ວ​ປະ­ເທດ ມີ​ຄົນ​ເຈັບ­ເປັນ​ໄຂ້­ຍຸງ​ລາຍ 39.003 ກໍ­ລະ­ນີ ເສຍ​ຊີ­ວິດ 76 ຄົນ ເຊິ່ງ​ສຳ­ລັບ​ນະ­ຄອນ­ຫຼວງ​ວຽງ​ຈັນ ມີ​ຜູ້​ເປັນ​ພະ­ຍາດ​ໄຂ້­ຍຸງ​ລາຍ​ຫຼາຍ​ກວ່າ​ໝູ່ ມີ 1.083 ຄົນ ເສຍ​ຊີ­ວິດ 25 ຄົນ ຕາມ​ສະ­ຖິ­ຕິ​ນີ້ ກໍ​ເປັນ​ເລື່ອງ​ໜ້າ​ຄິດ ເພາະ​ເມືອງ​ຫຼວງ​ແທ້ໆ​ບ່ອນ​ລວມ​ຄວາມ​ກ້າວ­ໜ້າ​ທຸກ​ດ້ານ ແຕ່​ຊ້ຳ­ພັດ​ມີ​ໄຂ້­ຍຸງ​ຫຼາຍ​ກວ່າ​ຕ່າງ​ແຂວງ ທ່ານ​ຜູ້​ອ່ານ​ກໍ​ອາດ​ຄິດ​ວ່າ ຍ້ອນ​ຄົນ​ນະ­ຄອນ­ຫຼວງ​ຫຼາຍ​ກວ່າ​ຕ່າງ​ແຂວງ ແຕ່​ຜູ້​ຂຽນ​ວ່າ ຍ້ອນ​ປະ­ໝາດ​ຫຼາຍ​ກວ່າ ເຊັ່ນ: ປະ­ໝາດ​ວ່າ​ເຮົາ​ຢູ່​ໃກ້​ໂຮງ­ໝໍ ບໍ່​ເປັນ​ຫຍັງ​ດອກ ເຮົາ​ຢູ່​ໃນ​ເມືອງ​ບໍ່​ມີ​ດອກ​ຍຸງ​ລາຍ.

    ພວກ​ເຮົາ​ບໍ່​ຄວນ​ລືມ​ວ່າ: ຄວາມ​ປະ­ໝາດ​ຄື​ເສັ້ນ­ທາງ​ແຫ່ງ​ຄວາມ​ຕາຍ ບໍ່​ວ່າ​ທຸກ​ຄົນ ຫຼື ສ່ວນ​ລວມ ຈຶ່ງ​ບໍ່​ຄວນ​ປະ­ໝາດ ຊ່ວຍ​ກັນ​ເອົາ­ໃຈ­ໃສ່​ປະ­ຕິ­ບັດ​ຕາມ​ຄຳ​ແນະ­ນຳ​ຂອງ​ຂັ້ນ​ເທິງ ເຊັ່ນ: ເອົາ­ໃຈ­ໃສ່​ທຳ­ລາຍ​ແຫຼ່ງ​ເພາະ​ພັນ​ເຊື້ອ​ຍຸງ​ລາຍ​ຕາມ​ຮ່ອງ­ນ້ຳ ອຸ​ໄຫ​ນ້ຳ ຫຼື ອ່າງ​ນ້ຳ​ທີ່​ບໍ່​ໃຊ້ ແລະ ບໍ່​ຈຳ­ເປັນ​ໃຊ້ ຊ່ວຍ​ກັນ​ຖາກ​ຖາງ​ປ່າ​ຫຍ້າ​ຮົກ​ຕາມ​ຮີມ​ຄອງ​ນ້ຳ ຫຼື ບໍ­ລິ­ເວນ​ອ້ອມ​ເຮືອນ​ໃນ​ເຂດ​ຂອງ​ຕົນ​ຮັບ­ຜິດ­ຊອບ ຂວ້ຳ​ກະ­ໂປະ ກະ​ປ໋ອງ ຫຼື ບ່ອນ​ມີ​ອຸ ຫຼື ໄຫ​ນ້ຳ ກໍ​ຄວນ​ປ່ອຍ​ປາ​ຫາງ​ນົກ​ຍຸງ​ໃສ່ ນອນ​ເວັນ​ກໍ​ກາງ​ມຸ້ງ​ດີ​ທີ່​ສຸດ.

    ການ​ປາບ​ປາມ ຫຼື ກຳ­ຈັດ​ພະ­ຍາດ​ໄຂ້­ຍຸງ​ລາຍ​ນັ້ນ ເຮັດ​ໄດ້​ຫຼາຍ​ວິ­ທີ​ສຳ­ຄັນ​ກໍ​ແມ່ນ​ປູກ­ຝັງ​ຈິດ​ສຳ­ນຶກ ໃຫ້​ປະ­ຊາ­ຊົນ​ຮັກ​ຄວາມ​ສະ­ອາດ ພໍ່​ແມ່​ຜູ້​ປົກ­ຄອງ ປະ­ພຶດ​ຕົນ​ເປັນ​ແບບ­ຢ່າງ ບໍ່​ຖິ້ມ​ຂີ້​ເຫຍື້ອ​ຊະ­ຊາຍ​ເປັນ​ຕົວ­ຢ່າງ ເຮັດ​ຄວາມ​ສະ­ອາດ​ໃຫ້​ເຍົາ­ວະ​ຊົນ ເຫັນ​ຜູ້​ໃຫຍ່​ເຮັດ​ເປັນ​ແບບ­ຢ່າງ​ແລ້ວ ເດັກ­ນ້ອຍ​ຍ່ອມ​ປະ­ຕິ­ບັດ​ຕາມ ເຮັດ​ສະ­ອາດ​ມື້­ນີ້​ດີ​ກວ່າ​ໜິ້ງ​ກັນ​ໄປ​ມາ​ບໍ່​ມີ​ວັນ​ຈົບ.

    ສະ­ເໜີ​ແລກ­ປ່ຽນ !

ໂດຍ: ດັ້ນ​ກີບ​ເມກ

ຂ່າວທີ່ກ່ຽວຂ້ອງ