ເບີ່ງບ້ານເຂົາເອົາບົດຮຽນ 11-03-2020

1.723 11 ມ.ນ. 2020 ຫົວຂໍ້ຂ່າວອື່ນໆ
ເບີ່ງບ້ານເຂົາເອົາບົດຮຽນ 11-03-2020

ມື້ນີ້​ມີ​ຂ່າວ​ກ່ຽວ​ກັບ​ມາດ​ຕະການ​ແກ້​ໄຂ​ບັນຫາ​ການ​ແຕ່ງດອງ​ໃນ​ໄວ​ເດັກ ຢູ່ ອິນ​ໂດ​ເນ​ເຊຍ ຕໍ່​ໃສ່​ເລື່ອງ​ກົດໝາຍ​ສັນຊາດ​ສະບັບ​ໃໝ່​ຂອງຣັດ​ເຊຍ

     ທີ່​ອິນ​ໂດ​ເນ​ເຊຍ: ມີ​ສະຖິຕິ​ທີ່​ໜ້າ​ວິຕົກ​ຈາກ​ອິນ​ໂດ​ເນ​ເຊຍ ກ່ຽວ​ກັບ​ບັນຫາ​ການ​ແຕ່ງດອງ​ໃນ​ໄວ​ເດັກ ຫຼື ເວົ້າ​ສັ້ນໆ ກໍ​ຄື ເລື່ອງ “ເມຍ​ເດັກ” ເຊິ່ງ​ເປັນ​ການ​ລະເມີດ​ສິດ ແລະ ອະນາຄົດ​ຂອງ​ເດັກ​ຍິງ ຂ່າວ​ວຽງ​ຈັນ​ທາມ (Vientiane Times 12 ທັນວາ 2017) ກ່ອນ​ໜ້າ​ນີ້​ເກືອບ 3 ປີ ບອກ​ວ່າ ອິນ​ໂດ​ເນ​ເຊຍ ຖືກ​ຈັດ​ເປັນ​ອັນ​ດັບ​ທີ 7 ຂອງ​ໂລກ ແລະ ເປັນ​ທີ 2 ໃນ​ອາ​ຊຽນ​ທີ່​ມີ​ບັນຫາ​ການ​ແຕ່ງດອງ​ໃນ​ໄວ​ເດັກ ເພື່ອ​ແກ້​ໄຂ​ບັນຫາ​ຊຳ​ເຮື້ອ​ດັ່ງກ່າວ ລັດຖະບານ​ຂອງ​ອິນ​ໂດ​ເນ​ເຊຍ ໄດ້​ເອົາ​ມາດ​ຕະການ​ຕົວ​ຈິງ​ເພື່ອ​ຕ້ານ​ປາກົດການ​ແຕ່ງດອງ​ໃນ​ໄວ​ເດັກ ເຊັ່ນ: ໄດ້​ເລີ່ມ​ຂະ​ບວນ​ການ​ຕ້ານ​ບັນຫາ​ຫຍໍ້ທໍ້​ດັ່ງກ່າວ​ໃນ​ເຂດ ນູ​ຊາ​ເຕັງ ກາ​ຣາ ຕາເວັນຕົກ (West Nusa Teuggara) ບ່ອນ​ທີ່​ບັນຫາ​ການ​ແຕ່ງດອງ​ໃນ​ໄວ​ເດັກ​ມີ​ແຜ່​ຫຼາຍ​ກວ່າ​ເຂດ​ອື່ນ ຂ່າວ​ບອກ​ວ່າ ທາງ​ກະຊວງ​ເພື່ອ​ສົ່ງເສີມ​ຄວາມ​ເຂັ້ມແຂງ​ຂອງ​ແມ່ຍິງ ແລະ ປົກ​ປ້ອງ​ເດັກ ໄດ້​ຮ່ວມ​ກັບ​ອຳນາດ​ການ​ປົກຄອງ​ເຂດ​ນູ​ຊາ​ເຕັງ​ກາ​ຣາ ຕາເວັນຕົກ ລົງ​ນາມ​ເອົາ​ຖະແຫຼງການ​ຮ່ວມ​ທີ່​ກຳນົດ​ໃຫ້​ບັນຫາ​ການ​ແຕ່ງດອງ​ໃນ​ໄວ​ເດັກ​ທີ່​ອິນ​ໂດ​ເນ​ເຊຍ ເປັນ​ບັນຫາ “ສຸກ​ເສີນ” ທີ່​ຕ້ອງ​ໄດ້​ແກ້​ໄຂ​ໃຫ້​ຕົກ​ໄປ​ຢ່າງ​ຮີບ​ດ່ວນ ສະຖິຕິ​ຂອງ​ກະຊວງ​ທີ່​ກ່າວ​ມາ​ຂ້າງ​ເທິງ​ນັ້ນ ໄດ້​ຊີ້​ອອກ​ວ່າ ໃນ​ປີ 2016 ບັນຫາ​ການ​ແຕ່ງດອງ​ໃນ​ໄວ​ເດັກ​ຢູ່​ທົ່ວ​ປະເທດ ອິນ​ໂດ​ເນ​ເຊຍ​ນັ້ນ ກວມ​ເອົາ 17% (ຂອງ​ການ​ແຕ່ງດອງ​ທັງ​ໝົດ).

   ທີ່ ຣັດ​ເຊຍ: ໃນ​ໄລຍະ​ກາງ​ປີ 2016 ກົດໝາຍ​ວ່າ​ດ້ວຍ​ສັນຊາດ​ຣັດ​ເຊຍ ແລະ ວ່າ​ດ້ວຍ​ຂໍ້​ກຳນົດ​ດ້ານ​ນິຕິ​ກຳ​ສຳລັບ​ຄົນ​ຕ່າງປະເທດ​ທີ່​ອາໄສ ແລະ ເຄື່ອນ​ໄຫວ​ຢູ່​ຣັດ​ເຊຍ ໄດ້​ມີ​ຜົນ​ບັງຄັບ​ໃຊ້ (ເລີ່ມ​ແຕ່​ວັນ​ທີ 1 ກໍລະກົດ 2016) ໂດຍ​ມີ​ການ​ໂຍະຍານ ສຳລັບ​ຄົນ​ຕ່າງປະເທດ​ທີ່​ເປັນ​ນັກທຸລະກິດ​ທີ່​ມີ​ຜົນສຳເລັດ​ສູງ ຫຼື ເປັນ​ຊ່ຽວຊານ​ທີ່​ເກ່ງ ລາຍ​ລະອຽດ​ຂອງ​ກົດໝາຍ​ກຳນົດ​ວ່າ ຄົນ​ຕ່າງປະເທດ​ທີ່​ໄດ້​ຮັບ​ການ​ບຳລຸງ​ສ້າງ​ໃນ​ສາຍ​ວິຊາ​ຊີບ​ຢູ່ ຣັດ​ເຊຍ ພາຍຫຼັງ​ປີ 2002 ແລະ ເຮັດ​ວຽກ​ຢູ່​ຣັດ​ເຊຍ​ມາ​ແລ້ວ​ບໍ່​ຕ່ຳ​ກວ່າ 3 ປີ​ນັ້ນ ມີ​ສິດ​ຍື່ນ​ຄຳ​ຮ້ອງ​ຂໍ​ສັນຊາດ ຣັດ​ເຊຍ ເງື່ອນໄຂ​ອື່ນ​ທີ່​ນັກທຸລະກິດ ແລະ ຊ່ຽວຊານ​ຕ່າງປະເທດ​ຕ້ອງ​ມີ ເພື່ອ​ຂໍ​ສັນຊາດ ຣັດ​ເຊຍ​ນັ້ນ ກໍ​ຄື ຕ້ອງ​ຈ່າຍ​ເງິນ​ເຂົ້າ​ໃນ​ກອງ​ທຶນ​ບຳນານ ຂັ້ນ​ຕອນ​ປະກອບ​ເອກະສານ​ຂໍ​ສັນຊາດ ໄດ້​ຖືກ​ປັບປຸງ​ໃຫ້​ງ່າຍດາຍ​ຂຶ້ນ​ສຳລັບ​ເຫຼົ່າ​ນັກທຸລະກິດ​ທີ່​ໄດ້​ເຮັດ​ວຽກ​ຢູ່ ຣັດ​ເຊຍ ເປັນ​ເວລາ 3 ປີ ແລະ ໄດ້​ເສຍ​ພາສີ​ຂອງ​ວິ​ສາ​ຫະ​ກິດ ແລະ ປະກັນ​ໄພ​ເຂົ້າ​ກອງ​ທຶນ​ບຳນານ​ໃນ​ຈຳນວນ 1 ລ້ານ​ຣຸບ​ຕໍ່​ປີ (ເງິນ​ຣັດ​ເຊຍ) ເປັນ​ຢ່າງ​ໜ້ອຍ ກົດໝາຍ​ທີ່​ວ່າ​ນີ້ ຍັງ​ມີ​ຜົນ​ບັງຄັບ​ໃຊ້​ກັບ​ຜູ້​ລີ້​ໄພ​ຊາວ​ຕ່າງປະເທດ ຄື ພາຍຫຼັງ​ໄດ້​ຮັບ​ອະນຸຍາດ​ໃຫ້​ລີ້​ໄພ ແລະ ອາໄສ​ຢູ່​ຣັດ​ເຊຍ​ຊົ່ວຄາວ​ແລ້ວ ຍັງ​ຈະ​ສາມາດ​ໄດ້​ຮັບ​ບັດ​ອະນຸຍາດ​ຕັ້ງ​ຖິ່ນ​ຖານ ຖ້າວ່າ​ຄົນ​ຕ່າງປະເທດ​ທີ່​ກ່ຽວຂ້ອງ​ໄດ້​ເຂົ້າ​ຮ່ວມ​ໃນ​ໂຄງການ​ແຫ່ງ​ຊາດ ວ່າ​ດ້ວຍ​ຜູ້​ລີ້​ໄພ​ດ້ວຍ​ຄວາມ​ສະໝັກ​ໃຈ ສະມາຊິກ​ຂອງ​ຜູ້​ທີ່​ໄດ້​ຮັບ​ສິດ​ຕັ້ງ​ຖິ່ນ​ຖານ​ກໍ​ຈະ​ໄດ້​ຊົມໃຊ້​ສິດ​ດັ່ງກ່າວ​ເຊັ່ນ​ກັນ.

 

ຂ່າວທີ່ກ່ຽວຂ້ອງ