ອາ​ຣາ​ບີ ຊາ​ອຸ​ດິດ ຈະ​ເພີ່ມ​ປະລິມານ​ການ​ຜະລິດ​ນ້ຳມັນ

1.906 10 ມ.ນ. 2020 ຂ່າວຕ່າງປະເທດ
ອາ​ຣາ​ບີ ຊາ​ອຸ​ດິດ ຈະ​ເພີ່ມ​ປະລິມານ​ການ​ຜະລິດ​ນ້ຳມັນ

     ຂ່າວສານ​ຣອຍ​ເຕີ ອ້າງ​ຕາມ​ແຫຼ່ງ​ຂ່າວ​ຕ່າງໆ ໃຫ້​ຮູ້ເມື່ອ​ວັນ​ທີ 8 ມີນາ​ທີ່​ຜ່ານ​ມາ​ວ່າ ອາ​ຣາ​ບີ ຊາ​ອຸ​ດິດ ຊຶ່ງ​ເປັນ​ປະເທດ​ຜູ້​ຜະລິດ​ນ້ຳມັນ​ລາຍ​ໃຫຍ່​ສຸດ​ຂອງ​ໂລກ ໄດ້​ປະກາດ​ແຜນການ​ເພີ່ມ​ປະລິມານ​ການ​ຜະລິດ​ນ້ຳມັນ​ດິບ​ຂຶ້ນ​ສູ່​ລະດັບ​ເກີນ 10 ລ້ານ​ບາ​ເຣນ/ວັນ ພາຍ​ໃນ​ເດືອນ​ເມສາ ປີ 2020 ທ່າມກາງ​ທີ່​ຂໍ້​ຕົກລົງ​ກ່ຽວ​ກັບ​ການ​ຕັດ​ຫຼຸດ​ແຫຼ່ງ​ສະໜອງ​ນ້ຳມັນ ລະຫວ່າງ​ອົງການ​ບັນດາ​ປະເທດ​ຜູ້​ສົ່ງ​ອອກ​ນ້ຳມັນ (OPEC) ກັບ​ຣັດ​ເຊຍ ຈະ​ໝົດ​ກຳນົດ​ລົງ​ຢ່າງ​ເປັນ​ທາງ​ການ​ໃນ​ທ້າຍ​ເດືອນ​ມີນາ​ນີ້.

    ເມື່ອ​ວັນ​ທີ 7 ມີນາ​ທີ່​ຜ່ານ​ມາ ມຸງກຸດ​ລາດ​ຊະ​ກຸມມານ ອັບ​ດູນ​ລາ​ຊິ​​ສ ບິນ ຊານ​ມານ ລັດຖະມົນຕີ​ພະລັງງານ​ຂອງ​ອາ​ຣາ​ບີ ຊາ​ອຸ​ດິດ ໄດ້​ໄປ​ຢ້ຽມຢາມ​ກຸ່ມ​ບໍລິສັດ ອາ​ຣາມ​ໂກ (Aramco) ແລະ​ໄດ້​ສະເໜີ​ໃຫ້​ກຸ່ມ​ບໍລິສັດ​ນີ້ ເພີ່ມ​ທະວີ​ແຫຼ່ງ​ສະໜອງ​ນ້ຳມັນ ຫຼັງ​ຈາກ​ທີ່​ຂໍ້​ຕົກລົງ​ກ່ຽວ​ກັບ​ການ​ຕັດ​ຫຼຸດ​ປະລິມານ​ການ​ຜະລິດ​ຂອງ​ກຸ່ມ  OPEC+ ສະບັບ​ໃນ​ປະຈຸ​ບັນ​ສິ້ນ​ສຸດ​ລົງ.

    ໃນ​ວັນ​ດຽວ​ກັນ Aramco ກໍ​ໄດ້​ຫຼຸດ​ລາຄາ​ນ້ຳມັນ​ທີ່​ຂາຍ​ຢ່າງ​ເປັນ​ທາງ​ການ (OSP) ໃນ​ເດືອນ​ເມສາ ສຳລັບ​ນ້ຳມັນ​ດິບ​ທຸກໆ​ປະເພດ. ນອກຈາກ​ນັ້ນແລ້ວ ປະລິມານ​ການ​ຜະລິດ​ນ້ຳມັນ​ຂອງ​ອາ​ຣາ​ບີ ຊາ​ອຸ​ດິດ ໃນ​ເດືອນ​ໜ້າ ຈະ​ສູງ​ກວ່​ວາ​ຫຼາຍ​ພໍ​ສົມຄວນ ເມື່ອ​ທຽບໃສ່​ລະດັບ 10 ລ້ານ​ບາ​ເຣນ/ວັນ ແລະ​ຍິ່ງ​ໄປ​ກວ່າ​ນັ້ນ ອາດ​ຈະ​ກ້າວ​ໄປ​ໃກ້​ແດນ 11 ລ້ານ​ບາ​ເຣນ/ວັນ. ປັດຈຸບັນ​ນີ້ ອາ​ຣາ​ບີ ຊາ​ອຸ​ດິດ ສູບ​ນ້ຳມັນ​ລວມ​ແລ້ວ 9,7 ລ້ານ​ບາ​ເຣນ/ວັນ ໃນ​ຂະນະ​ທີ່​ກຳລັງ​ການ​ຜະລິດ​ນ້ຳມັນ​ຂອງ​ປະເທດ​ນີ້ ຢູ່​ທີ່  12 ລ້ານ​ບາ​ເຣນ/ວັນ.

    ການ​ເຈລະຈາ​ຂໍ້​ຕົກລົງ​ເປັນ​ເວລາ 3 ປີ ລະຫວ່າງ OPEC ກັບ​ຣັດ​ເຊຍ ສິ້ນ​ສຸດ​ລົງ​ເມື່ອ​ວັນ​ທີ 6 ມີນາ​ທີ່​ຜ່ານ​ມາ ຫຼັງ​ຈາກ​ທີ່​ຣັດ​ເຊຍ ປະຕິເສດ​ສືບຕໍ່​ຕັດ​ຫຼຸດ​ປະລິມານ​ການ​ຜະລິດ​ນ້ຳມັນ​ດິບ​ລົງ​ຫຼາຍ​ກວ່າ​ເກົ່າ ເພື່ອ​ຮັບ​ມື​ກັບ​ການ​ລະບາດ​ຂອງ​ພະຍາດ COVID-19. ສິ່ງ​ດັ່ງກ່າວ​ໄດ້​ເຮັດ​ໃຫ້ OPEC ຕອບ​ໂຕ້​ດ້ວຍ​ວິທີ​ຍົກເລີກ​ທຸກໆ​ຂີດ​ຈຳກັດ​ໃນ​ການ​ຜະລິດ​ຂອງ​ຕົນ.

    ຫຼ້າ​ສຸດ ລາຄາ​ນ້ຳມັນ​ໃນ​ຕະຫຼາດ​ອາຊີ ລະຫວ່າງ​ການ​ຊື້​ຂາຍ​ໃນ​ຕອນ​ແລງ​ຂອງ​ວັນ​ທີ 9 ມີນາ​ນີ້ ໄດ້​ຫຼຸດ​ລົງ​ເກືອບ 1/3 ຊຶ່ງ​ເປັນ​ລະດັບ​ຫຼຸດ​ລົງ​ແຮງ​ທີ່​ສຸດ ນັບ​ແຕ່​ສົງຄາມ​ເຂດ​ອ່າວ​ເປີ​ເຊຍ ເມື່ອ​ປີ 1991 ເປັນຕົ້ນ​ມາ. ທີ່​ຕະຫຼາດ​ໂຕ​ກຽວ ລາຄາ​ນ້ຳມັນ ເບຣນ ຕາມ​ກຳນົດ​ສົ່ງ​ມອບ​ນັ້ນ​ໄດ້​ຫຼຸດ​ລົງ 11,38 ໂດ​ລາ​ສະຫະລັດ (25%) ລົງ​ມາ​ເປັນ 33,89 ໂດ​ລາ​ສະຫະລັດ/ບາ​ເຣນ ໃນ​ຕອນ​ບ່າຍ​ຂອງ​ວັນ​ທີ 9 ມີນາ ໃນ​ຂະນະ​ທີ່​ລາຄາ​ນ້ຳມັນ​ປະເພດ​ນ້ຳ​ເບົາ​ຂອງ ສ ອາ​ເມ​ຣິ​ກາ (WTI) ກໍ​ຫຼຸດ​ລົງ  11,12 ໂດ​ລາ​ສະຫະລັດ (27%) ລົງ​ໄປ​ຢູ່​ທີ່ 30,16 ໂດ​ລາ​ສະຫະລັດ/ບາ​ເຣນ. ສ່ວນ​ຢູ່​ທີ່​ຕະຫຼາດ​ສິງກະໂປ ລາຄາ​ນ້ຳມັນ​ປະເພດ WTI ໃນ​ຕອນ​ແລງ​ຂອງ​ວັນ​ດຽວ​ກັນ ໄດ້​ຫຼຸດ​ລົງ​ປະມານ 30% ໃນ​ຂະນະ​ທີ່​ລາຄາ​ນ້ຳມັນ​ເບຣນ ຫຼຸດ​ລົງ 26%.

ຂ່າວທີ່ກ່ຽວຂ້ອງ