WHO ​ແຈ້ງ​ເຕືອນ​ໄປ​ຍັງ​ປະ​ເທດ​ຕ່າງໆ

2.124 10 ມ.ນ. 2020 ຂ່າວຕ່າງປະເທດ
WHO ​ແຈ້ງ​ເຕືອນ​ໄປ​ຍັງ​ປະ​ເທດ​ຕ່າງໆ

    ທ່ານ ເທດ​​ຣົສ ອາ​ດາ​ນອມ ເກ​ເບຣ​ເຢ​ຊຸ​​ສ ຜູ້ອຳນວຍການ​ໃຫຍ່​ຂອງ​ອົງການ​ອະນາໄມ​ໂລກ (WHO) ກ່າວ​ຕໍ່​ຜູ້​ສື່​ຂ່າວ ຢູ່​ທີ່​ນະຄອນ​ເຊີ​ແນວ (ປະເທດ​ສະ​ວິດ) ເມື່ອ​ວັນ​ທີ 9 ມີນາ​ນີ້ ວ່າ​ປັດຈຸບັນ​ນີ້ ການ​ລະບາດ​ຂອງ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ (SARS-CoV-2) ທີ່​ພາໃຫ້​ເກີດ​ພະຍາດ​ອັກເສບ​ທາງ​ລະບົບ​ຫາຍໃຈ​ຮຸນ​ແຮງ (COVID-19) ໄດ້​ປະກົດ​ຕົວ​ຢູ່​ໃນ​ຫຼາຍ​ປະເທດ​ເກີນ​ໄປ ແລະ​ອາດ​ເກີດ​ຄວາມ​ສ່ຽງ​ເກີດ​ການ​ລະບາດ​ຄັ້ງ​ໃຫຍ່ ແຕ່​ທ່ານ​ກໍ​ເນັ້ນ​ໜັກ​ວ່າ ໄວ​​ຣັສ​ສາຍ​ພັນ​ດັ່ງກ່າວ ຍັງ​ສາມາດ​ທີ່​ຈະ​ຄວບ​ຄຸມ​ໄດ້.

    ກ່ອນ​ໜ້າ​ນັ້ນ ທ່ານ  ເກ​ເບຣ​ເຢ​ຊຸ​​ສ ໄດ້​ກ່າວ​ຕໍ່​ຜູ້​ສື່​ຂ່າວ ຢູ່​ທີ່​ນະຄອນ​ເຊີ​ແນວ ເມື່ອ​ວັນ​ທີ 5 ມີນາ​ທີ່​ຜ່ານ​ມາ ໂດຍ​ທ່ານ​ໄດ້​ສະແດງ​ຄວາມ​ກັງວົນ​ຕໍ່​ການ​ທີ່​ມີ​ຫຼາຍ​ປະເທດ ຍັງ​ບໍ່​ທັນ​ຊີ້​ໃຫ້​ເຫັນ​ເຖິງ “ລະດັບ​ຄຳ​ສັນຍາ​ທາງ​ການເມືອງ” ທີ່​ຈຳເປັນ​ເພື່ອ “ຮັບ​ມື​ກັບ​ໄພ​ຄຸກ​ຄາມ​ທີ່​ທຸກໆ​ຄົນ​ພວມ​ປະ​ເຊີນ​ຢູ່.” WHO ແຈ້ງ​ເຕືອນ​ວ່າ ມີ​ຫຼາຍ​ປະເທດ​ຍັງ​ບໍ່​ຜັນ​ຂະຫຍາຍ​ທຸກໆ​ມາດ​ຕະການ​ທີ່​ຈຳເປັນ ເພື່ອ​ສະກັດ​ກັ້ນ​ການ​ແຜ່​ລາມ​ຂອງ​ພະຍາດ COVID-19.

    ທ່ານ ເກ​ເບຣ​ເຢ​ຊຸ​​ສ ກ່າວ​ເນັ້ນ​ວ່າ ພະຍາດ​ດັ່ງກ່າວ ເປັນ​ໄພ​ຄຸກ​ຄາມ​ຕໍ່​ທຸກໆ​ປະເທດ ນັບ​ທັງ​ປະເທດ​ທີ່​ລ້ຳ​ລວຍ ແລະ​ປະເທດ​ທີ່​ທຸກ​ຍາກ ພ້ອມ​ກັນ​ນັ້ນ​ທ່ານ​ກໍ​ໄດ້​ແຈ້ງ​ເຕືອນ​ວ່າ ແມ້​ກະ​ທັ້ງ​ວ່າ​ບັນດາ​ປະເທດ​ທີ່​ມີ​ລາຍ​ຮັບ​ສູງ ກໍ​ຄວນ​ມີ​ສະຕິ​ລະວັງ​ຕົວ​ຕໍ່​ເຫດການ​ທີ່​ບໍ່​ອາດ​ຄາດ​ຄິດ.

    ເຖິງ​ຢ່າງໃດ​ກໍ​ຕາມ ປັດຈຸບັນ​ນີ້ ມີ​ຫຼາຍ​ປະເທດ​ໄດ້​ໃຊ້​ມາດ​ຕະການ​ທີ່​ແຂງ​ແກ່ນ​ຂຶ້ນ​ເພື່ອ​ສະກັດ​ກັ້ນ​ການ​ແຜ່​ລາມ​ຂອງ​ພະຍາດ ໃນ​ນັ້ນ​ມີ​ຄຳ​ສັ່ງ​ໃຫ້​ປິດ​ໂຮງຮຽນ​ແຫ່ງ​ຕ່າງໆ. ອົງການ​ສຶ​ສາ ວິທະຍາສາດ ແລະ​ວັດທະນະທຳ ຂອງ​ສະຫະ​ປະຊາ​ຊາດ (UNESCO) ໃຫ້​ຮູ້​ວ່າ ນັກຮຽນ ນັກ​ສຶກ​ສາ ປະມານ 290,5 ລ້ານ​ຄົນ ພັກ​ຮຽນ​ເປັນ​ເວລາ​ຫຼາຍ​ອາທິດ ຫຼັງ​ຈາກ​ທີ່​ມີ 10 ປະເທດ​ໃນ​ໂລກ ປະກາດ​ປິດ​ການ​ຮຽນ​ການ​ສອນ.

    ໃນ​ຂະນະ​ດຽວ​ກັນ ມີ​ລາຍ​ງານ​ຂ່າວ​ອອກ​ມາ​ວ່າ ໄລ່​ມາ​ຮອດ​ຕອນ​ເຊົ້າ​ຂອງ​ວັນ​ທີ 10 ມີນາ​ນີ້ ຈຳນວນ​ຜູ້​ເສຍ​ຊີວິດ​ຍ້ອນ​ພະຍາດ COVID-19 ໃນ​ທົ່ວ​ໂລກ ມີ​ຢູ່​ທີ່ 4.009 ຄົນ ໃນ​ຂະນະ​ທີ່​ຜູ້​ຕິດພະຍາດ COVID-19 ມີ​ຢູ່​ທີ່ 112.758 ຄົນ ແລະ​ມີ​ຜູ້​ໄດ້​ຮັບ​ການ​ປິ່ນປົວ​ດີ ຈຳນວນ 63.653 ຄົນ.

ຂ່າວທີ່ກ່ຽວຂ້ອງ