ນັກ​ໂທດ​ຫຼາຍ​ສິບ​ຄົນ​ໂຕນ​ໜີ​ອອກ​ຈາກ​ຄຸກ​ຢູ່​ໃນ​ອີ​ຕາ​ລີ

2.055 10 ມ.ນ. 2020 ຂ່າວຕ່າງປະເທດ
ນັກ​ໂທດ​ຫຼາຍ​ສິບ​ຄົນ​ໂຕນ​ໜີ​ອອກ​ຈາກ​ຄຸກ​ຢູ່​ໃນ​ອີ​ຕາ​ລີ

    ຕາມ​ຂ່າວ​ຕ່າງປະເທດ ນັກໂທດ​ປະມານ 50 ຄົນ ໄດ້​ໂຕນ​ໜີ​ອອກ​ຈາກ​ຄຸກ ຟອກ​ເກຍ (Foggia) ຢູ່​ໃນ​ເຂດ ປັກ​ເລຍ (ພາກ​ໃຕ້​ອີ​ຕາ​ລີ) ລະຫວ່າງ​ທີ່​ເກີດ​ເຫດການ​ວຸ້ນວາຍ​ຂຶ້ນ​ຢູ່​ໃນ​ຄຸກ​ດັ່ງກ່າວ ໃນ​ວັນ​ທີ 9 ມີນາ​ນີ້ (ຕາມ​ເວລາ​ໃນ​ທ້ອງຖິ່ນ). ເຈົ້າ​ໜ້າທີ່​ຕຳຫຼວດ​ໄດ້​ເຂົ້າ​ໄປ​ລະງັບ​ເຫດການ ແລະ ຈັບ​ຕົວ​ນັກໂທດ​ທີ່​ກໍ່​ເຫດ​ໄດ້ 30 ຄົນ ແຕ່​ກໍ​ຍັງ​ມີ​ອີກ 20 ຄົນ​ໜີ​ໄປ​ໄດ້.

    ສຳນັກ​ຂ່າວສານ ANSA ອ້າງ​ຕາມ​ຂໍ້​ມູນ​ຂອງ​ເຈົ້າ​ໜ້າທີ່​ສືບສວນ​ສອບ​ສວນ ໃຫ້​ຮູ້​ວ່າ ການ​ປະ​ທ້ວງ ພາໃຫ້​ເກີດ​ຄວາມ​ວຸ້ນວາຍ ແມ່ນ​ເພື່ອ​ຄັດຄ້ານ​ຕໍ່​ເຈົ້າ​ໜ້າທີ່​ຮັກສາ​ຄວາມ​ສະຫງົບ​ໃນ​ຄຸກ​ດັ່ງກ່າວ ທີ່​ໄດ້​ປະຕິບັດ​ຄຳ​ສັ່ງ​ຫ້າມ​ນັກໂທດ ພົບ​ປະ​ກັບ​ຍາດຕິ​ພີ່ນ້ອງ ຕາມ​ທີ່​ໄດ້​ກຳນົດ​ຢູ່​ໃນ​ດຳລັດ​ວ່າ​ດ້ວຍ​ພາວະ​ສຸກ​ເສີນ ກັບ​ພະຍາດ​ອັກເສບ​ທາງ​ລະບົບ​ຫາຍໃຈ​ຮຸນ​ແຮງ (COVID-19) ນັ້ນ​ໄດ້​ເລີ່ມ​ເກີດ​ຂຶ້ນ​ເມື່ອ​ວັນ​ທີ 8 ມີນາ​ທີ່​ຜ່ານ​ມາ.

    ມາ​ຮອດ​ເວລາ​ນີ້ ກໍລະນີ​ເກີດ​ຄວາມ​ວຸ້ນວາຍ ໄດ້​ເກີດ​ຂຶ້ນ​ຢູ່​ໃນ​ຄຸກ 27 ແຫ່ງ ໃນ​ທົ່ວ​ປະເທດ​ອີ​ຕາ​ລີ ໂດຍ​ທີ່​ມີ​ນັກໂທດ​ຈຳນວນ​ໜຶ່ງ ສະເໜີ​ໃຫ້​ມີ​ການ​ໃຫ້​ອະໄພໂທດ ແລະ ກັກ​ບໍລິເວນ​ຢູ່​ໃນ​ເຮືອນ ເພາະວ່າ​ມີ​ຄວາມ​ກັງວົນ​ກ່ຽວ​ກັບ​ການ​ຕິດພະຍາດ COVID-19.

ຂ່າວທີ່ກ່ຽວຂ້ອງ