ສ ອາ​ເມ​ຣິ​ກາ ​ເລີ່​ມ​ແຜນການ​ຖອນ​ທະຫານ​ອອກ​ຈາກ​ອາ​ຟະ​ກາ​ນິດ​ສະຖານ

1.997 10 ມ.ນ. 2020 ຂ່າວຕ່າງປະເທດ
ສ ອາ​ເມ​ຣິ​ກາ ​ເລີ່​ມ​ແຜນການ​ຖອນ​ທະຫານ​ອອກ​ຈາກ​ອາ​ຟະ​ກາ​ນິດ​ສະຖານ

    ພັນ​ເອກ ໂຊ​ນີ ລິກ​ເກດ ໂຄສົກ​ຂອງ​ກອງ​ກຳລັງ​ຂອງ ສ ອາ​ເມ​ຣິ​ກາ ຢູ່​ໃນ​ອາ​ຟະ​ກາ​ນິດ​ສະຖານ ແຈ້ງ​ໃຫ້​ຮູ້ເມື່ອ​ວັນ​ທີ 9 ມີນາ​ນີ້​ວ່າ ສ ອາ​ເມ​ຣິ​ກາ ໄດ້​ເລີ່ມ​ຕົ້ນ​ການ​ຖອນ​ທະຫານ​ອອກ​ຈາກ  ອາ​ຟະ​ກາ​ນິດ​ສະຖານ ຊຶ່ງ​ເປັນ​ສ່ວນ​ໜຶ່ງ​ຂອງ​ຂໍ້​ຕົກລົງ​ສັນຕິພາບ ທີ່​ບັນລຸ​ໄດ້​ກັບ​ກຸ່ມ​ມື​ປືນ ຕາ​ລີ​ບັນ ເມື່ອ​ວັນ​ທີ 29 ກຸມພາ​ທີ່​ຜ່ານ​ມາ.

    ເປັນ​ທີ່​ຊາບ​ກັນ​ວ່າ ສ ອາ​ເມ​ຣິ​ກາ​ໃຫ້​ສັນຍາ​ຕັດ​ຫຼຸດ​ທະຫານ​ຂອງ​ຕົນ​ຢູ່​ໃນ​ອາ​ຟະ​ກາ​ນິດ​ສະຖານ ຈາກ​ລະດັບ​ທີ່​ມີ​ກວ່າ 12.000 ຄົນ​ໃນ​ປັດຈຸບັນ ໃຫ້​ລົງ​ໄປ​ຍັງ​ເຫຼືອ​ທີ່ 8.600 ຄົນ ພາຍ​ໃນ​ຮອບ​ເວລາ 135 ວັນ ນັບ​ແຕ່​ລົງ​ນາມ​ຂໍ້​ຕົກລົງ​ດັ່ງກ່າວ​ເປັນຕົ້ນ​ໄປ.

    ຖະແຫຼງການ​ຂອງ​ພັນ​ເອກ ໂຊ​ນີ ລິກ​ເກດ ເນັ້ນ​ໜັກ​ວ່າ ທ່າມກາງ​ການ​ຕັດ​ຫຼຸດ​ທະຫານ​ຄື​ດັ່ງກ່າວ ກອງ​ກຳລັງ​ຂອງ ສ ອາ​ເມ​ຣິ​ກາ ກໍ​ຍັງ​ຄົງ​ຮັກສາ​ພາຫະນະ​ການ​ທະຫານ ແລະ ສິດ​ອຳນາດ​ທັງ​ໝົດ​ເອົາ​ໄວ້ ເພື່ອ​ໃຫ້​ສຳເລັດ​ບັນດາ​ເປົ້າ​ໝາຍ​ຂອງ ສ ອາ​ເມ​ຣິ​ກາ ໃນ​ນັ້ນ​ມີ​ການ​ປະຕິບັດ​ບັນດາ​ບັ້ນ​ຮົບ​ຕ້ານ​ການ​ກໍ່​ການ​ຮ້າຍ ທີ່​ແນໃສ່​ເຄືອ​ຂ່າຍ​ກໍ່​ການ​ຮ້າຍ​ສາກົນ ອາ​​ລ ໄກ​ດາ ແລະ ອົງການ​ລັດ​ມຸ​ສລິມ ຢູ່​ໃນ​ອີ​ຣັກ ແລະ ເລ​ວັນ (ISIS-K) ພ້ອມ​ກັນ​ນັ້ນ​ກໍ​ສະໜອງ​ຄວາມ​ຊ່ວຍເຫຼືອ ໃຫ້​ແກ່​ກອງ​ກຳລັງ​ປ້ອງ​ກັນ ຊາດ ແລະ​ປ້ອງ​ກັນ​ຄວາມ​ສະຫງົບ​ຂອງ​ອາ​ຟະ​ກາ​ນິດ​ສະຖານ.

    ຖະແຫຼງການ​ດັ່ງກ່າວ ຖືກ​ນຳ​ອອກ​ມາ​ທ່າມກາງ​ທີ່​ກອງທັບ ສ ອາ​ເມ​ຣິ​ກາ ໄດ້​ປະຕິບັດ​ການ​ໂຈມ​ຕີ​ທາງ​ອາກາດ​ເປັນ​ເທື່ອ​ທຳ​ອິດ ໃນ​ຮອບ 11 ວັນ​ທີ່​ຜ່ານ​ມາ ໂດຍ​ແນໃສ່​ພວກ​ມື​ປືນ​ຕາ​ລີ​ບັນ ເພື່ອ​ເປັນ​ການ​ຕອບ​ໂຕ້​ຕໍ່​ການ​ໂຈມ​ຕີ​ລາຍ​ໜຶ່ງ​ຂອງ​ຕາ​ລີ​ບັນ ໃສ່​ກອງທັບ​ຂອງ​ຝ່າຍ​ລັດຖະບານ​ອາ​ຟະ​ກາ​ນິດ​ສະຖານ ຢູ່​ໃນ​ພື້ນ​ທີ່​ແຂວງ ເຮລ​ມັນ (ພາກ​ໃຕ້​ອາ​ຟະ​ກາ​ນິດ​ສະຖານ). ການ​ໂຈມ​ຕີ​ຕ່າງໆ​ດັ່ງກ່າວ ເກີດ​ຂຶ້ນ​ຫຼັງ​ຈາກ​ທີ່​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ແຈ້ງ​ອອກ​ມາ​ຢ່າງ​ບໍ່​ຄາດ​ຝັນ​ເມື່ອ​ວັນ​ທີ 3 ມີນາ​ທີ່​ຜ່ານ​ມາ ວ່າ​ທ່ານ​ໄດ້​ມີ​ການ​ປຶກສາ​ຫາລື​ຢ່າງ​ຈົບງາມ​ກັບ ມູ​ລາ ບາ​ຣາ​ລາ ຫົວໜ້າ​ຝ່າຍ​ການເມືອງ​ຂອງ​ກຸ່ມ​ຕາ​ລີ​ບັນ.

    ຂໍ້​ຕົກລົງ​ທີ່​ບັນລຸ​ໄດ້​ລະຫວ່າງ ສ ອາ​ເມ​ຣິ​ກາ ກັບ​ຕາ​ລີ​ບັນ ນັ້ນ ລະບຸ​ວ່າ ການ​ເຈລະຈາ​ຮອບ​ຕ່າງໆ​ຢູ່​ພາຍ​ໃນ​ອາ​ຟະ​ກາ​ນິດ​ສະຖານ ຄາດ​ວ່າ​ຈະ​ເລີ່ມ​ຂຶ້ນ​ນັບ​ແຕ່​ວັນ​ທີ 10 ມີນາ​ນີ້​ເປັນຕົ້ນ​ໄປ. ແຕ່​ວ່າ ຄວາມ​ຂັດ​ແຍ່ງ​ໃນ​ບັນຫາ​ການ​ແລກປ່ຽນ​ສະ​ເລີຍ​ເສິກ ໄດ້​ເຮັດ​ໃຫ້​ເກີດ​ເງົາ​ມືດ​ປົກ​ຄຸມ​ໃສ່​ຄວາມ​ຫວັງ​ຂອງ​ການ​ເຈລະຈາ​ດັ່ງກ່າວ.  ຂໍ້​ຕົກລົງ​ນັ້ນ ປະກອບ​ມີ​ຄຳ​ສັນຍາ​ທີ່​ວ່າ ຕາ​ລີ​ບັນ ຕ້ອງ​ໄດ້​ໃຫ້​ອິດ​ສະລະ​ແກ່​ນັກໂທດ​ສູງ​ສຸດ​ທີ່ 1.000 ຄົນ ແລະ ຝ່າຍ​ລັດຖະບານ​ອາ​ຟະ​ກາ​ນິດ​ສະຖານ ຕ້ອງ​ປ່ອຍ​ຕົວ​ນັກໂທດ​ຝ່າຍ​ມີ​ປືນ​ໃຫ້​ເປັນ​ອິດ​ສະລະ​ປະມານ 5.000 ຄົນ. ໃນ​ຂະນະ​ທີ່​ຕາ​ລີ​ບັນ​ຖື​ວ່າ ການ​ດຳເນີນ​ການ​ດັ່ງກ່າວ ເປັນ​ປະຖົມ​ປັດ​ໄຈ​ເພື່ອ​ດຳເນີນ​ການ​ເຈລະຈາ​ນັ້ນ ປະທານາທິບໍດີ ອາ​ຟະ​ກາ​ນິດ​ສະຖານ ອາ​ສຣາ​​ຟ ກາ​ນີ ພັດ​ປະຕິເສດ​ຕໍ່​ການ​ແລກປ່ຽນ​ນັກໂທດ ກ່ອນ​ທີ່​ການ​ເຈລະຈາ​ເລີ່ມ​ຂຶ້ນ.

    ອີກ​ດ້ານ​ໜຶ່ງ ທ່ານ ອາ​ສຣາ​​ຟ ກາ​ນີ ໄດ້​ສາບານ​ຕົນ​ຮັບ​ຕຳແໜ່ງ​ປະທານາທິບໍດີ​ອາ​ຟະ​ກາ​ນິດ​ສະຖານ ເປັນ​ສະໄໝ​ທີ 2 ໃນ​ພິທີ​ທີ່​ໄດ້​ຈັດ​ຂຶ້ນ​ເມື່ອ​ວັນ​ທີ 9 ມີນາ​ນີ້ ທີ່​ນະຄອນຫຼວງ​ກາ​ບູນ ຊຶ່ງ​ມີ​ຂຶ້ນ​ໃນ​ຂະນະ​ທີ່​ທ່ານ ອັບ​ດູນ​ລາ ອັບ​ດູນ​ລາ ທີ່​ເປັນ​ຄູ່​ແຂ່ງ​ຄົນ​ສຳຄັນ​ຂອງ​ທ່ານ ກາ​ນີ ໃນ​ການ​ເລືອກ​ຕັ້ງ​ປະທານາທິບໍດີ ເມື່ອ​ເດືອນ​ກັນຍາ ປີ 2019 ກໍ​ຈັດ​ພິທີ​ສາບານ​ຕົນ​ຮັບ​ຕຳແໜ່ງ​ປະທານາທິບໍດີ ໃນ​ເວລາ​ດຽວ​ກັບ​ກັບ​ພິທີ​ສາບານ​ຕົນ​ຂອງ​ທ່ານ ກາ​ນີ.

ຂ່າວທີ່ກ່ຽວຂ້ອງ