30% ຂອງ​ບັນດາ​ຜູ້​ຄຸ້ມ​ຄອງ​ວິ​ສາ​ຫະ​ກິດ​ຢູ່​ໃນ​ເອີ​ຣົບ ​ເປັນ​ແມ່ຍິງ

2.008 10 ມ.ນ. 2020 ຂ່າວຕ່າງປະເທດ
30% ຂອງ​ບັນດາ​ຜູ້​ຄຸ້ມ​ຄອງ​ວິ​ສາ​ຫະ​ກິດ​ຢູ່​ໃນ​ເອີ​ຣົບ ​ເປັນ​ແມ່ຍິງ

    ອົງການ​ສະຖິຕິ​ເອີ​ຣົບ (Eurostat) ມີ​ຕົວ​ເລກ​ລາຍ​ງາ​ນອກ​ມາ​ເມື່ອ​ວັນ​ທີ 6 ມີນາ​ທີ່​ຜ່ານ​ມາ ຊີ້​ໃຫ້​ເຫັນ​ວ່າ ຜູ້​ຄຸ້ມ​ຄອງ​ວິ​ສາ​ຫະ​ກິດ​ຢູ່​ໃນ​ເອີ​ຣົບ 3 ຄົນ​ໃດ ແມ່ນ​ມີ​ແມ່ຍິງ​ພຽງ 1 ຄົນ ເຖິງ​ແມ່ນ​ວ່າ​ເພດ​ຍິງ​ກວມ​ເອົາ​ເຖິງ 50% ຂອງ​ກຳລັງ​ແຮງ​ງານ​ຢູ່​ໃນ​ທະວີບ​ດັ່ງກ່າວ​ກໍ​ຕາມ.

    ໃນ​ບົດ​ລາຍ​ງານ​ດັ່ງກ່າວ ຊຶ່ງ​ມີ​ອອກ​ມາ 2 ວັນ ກ່ອນ​ວັນ​ແມ່ຍິງ​ສາກົນ 8 ມີນາ​ນັ້ນ  Eurostat ໃຫ້​ຮູ້​ວ່າ ໃນ​ປີ 2019 ໃນ​ຈຳນວນ​ຜູ້​ຄຸ້ມ​ຄອງ​ວິ​ສາ​ຫະ​ກິດ​ຢູ່​ໃນ​ເອີ​ຣົບ 6,7 ລ້ານ​ຄົນ ແມ່ນ​ມີ​ແມ່ຍິງ​ພຽງ 2,5 ລ້ານ​ຄົນ. ໃນ 27 ປະເທດ​ທີ່​ເປັນ​ສະມາຊິກ​ສະຫະພາບ​ເອີ​ຣົບ (EU) ແມ່ນ​ມີ​ພຽງ​ປະເທດ​ລັດ​ວີ​ເທົ່າ​ນັ້ນ ເປັນ​ປະເທດ​ທີ່​ມີ​ອັດຕາ​ສ່ວນ​ບັນດາ​ນັກ​ຄຸ້ມ​ຄອງ​ທີ່​ເປັນ​ແມ່ຍິງ​ສູງ​ກວ່າ ເມື່ອ​ທຽບໃສ່​ເພດ​ຊາຍ ແລະ ອັນ​ດັບ​ຮອງ​ລົງ​ມາ​ກໍ​ແມ່ນ ບູນ​ກາ​ຣີ ໂປ​ໂລຍ  ແລະ  ເອ​​ສ​ໂຕ​ນີ  ໃນ​ຂະນະ​ທີ່ຢູ່​ໃນ​ໝວດ​ອັນ​ດັບ​ສຸດ​ທ້າຍ​ກໍ​ແມ່ນ ໄຊ​​ປຣັສ ລຸກ​ຊຳ​ບວກ ແລະ ດານ​ມາກ. ນອກຈາກ​ນັ້ນແລ້ວ ແມ່ຍິງ​ກໍ​ກວມ​ເອົາ​ພຽງ​ທີ່ 25% ຢູ່​ໃນ​ຄະນະ​ນຳ​ຂອງ​ຂອງ​ບັນດາ​ບໍລິສັດ​ທີ່​ຕິດ​ຜະ​ນຶກ​ລາຄາ​ທີ່​ເປີດເຜີຍ​ຢູ່​ໃນ​ເອີ​ຣົບ.

    ທ່ານ ເຮ​ເລ​ນາ ດາ​ລີ ຂ້າ​ຫຼວງ​ໃຫຍ່​ເອີ​ຣົບ ຮັບຜິດຊອບ​ບັນຫາ​ສິດ​ສະເໝີພາບ ໃຫ້​ຮູ້​ວ່າ  EC ຫວັງ​ວ່າ​ຈະ​ສາມາດ​ຟື້ນ​ຟູ​ບັນດາ​ແຜນການ​ໃນ​ການ​ປະຕິບັດ​ກຳນົດ​ແບບ​ບັງຄັບ​ກ່ຽວ​ກັບ​ປະລິມານ​ແມ່ຍິງ ຢູ່​ໃນ​ຄະນະ​ນຳ​ຂອງ​ບັນດາ​ບໍລິສັດ ຊຶ່ງ​ຖືກ​ບາງ​ປະເທດ​ສະມາຊິກ EU ຄັດຄ້ານ​ນັບ​ແຕ່​ປີ 2012 ເປັນຕົ້ນ​ມາ.

    ໃນ​ຂະນະ​ດຽວ​ກັນ ທ່ານ ເວ​ຣາ ຈູ​ໂຣ​ວາ ຮອງ​ປະທານ EU ເວົ້າ​ວ່າ​ປະເທດ​ສະມາຊິກ EU ຈຳນວນ​ໜຶ່ງ ໄດ້​ນຳ​ເອົາ​ກຳນົດ​ດັ່ງກ່າວ​ອອກ​ມາ ໃນ​ນັ້ນ​ມີ​ຝຣັ່ງ ຊຶ່ງ​ມີ 45% ຂອງ​ຈຳນວນ​ສະມາຊິກ​ໃນ​ຄະນະ​ນຳ​ບໍລິສັດ ນັ້ນ​ເປັນ​ເພດ​ຍິງ ຕາມ​ມາ​ດ້ວຍ​ຊູ​ແອດ ແບນ​ຊິກ ເຢຍ​ລະ​ມັນ ແລະ ອີ​ຕາ​ລີ.

ຂ່າວທີ່ກ່ຽວຂ້ອງ