ລາວ-ມຽນມາ ສືບຕໍ່ເສີມຂະຫຍາຍການຮ່ວມມື 2 ຝ່າຍ

1.049 10 ມ.ນ. 2020 ຂ່າວໜ້າ​ໜຶ່ງ
ລາວ-ມຽນມາ ສືບຕໍ່ເສີມຂະຫຍາຍການຮ່ວມມື 2 ຝ່າຍ

    ໂດຍ​ຕອບ​ສະ­ໜອງ​ຕາມ​ການ​ເຊີນ​ຂອງ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ ປະ­ເທດ ສປປ ລາວ ທ່ານ ອູ ຈໍ ຕິນ ລັດ­ຖະ­ມົນ­ຕີ​ກະ­ຊວງ​ຮ່ວມ​ມື​ສາ­ກົນ ສສ ມຽນ​ມາ  ໄດ້​ນຳ­ພາ​ຄະ­ນະ​ຜູ້​ແທນ​ເດີນ­ທາງ​ມາ​ຢ້ຽມ­ຢາມ ສປປ ລາວ ເປັນ​ທາງ​ການ ແລະ ເປັນ​ປະ­ທານ​ຮ່ວມ​ກອງ​ປະ­ຊຸມ​ຄະ­ນະ​ກຳ­ມາ​ທິ​ການ​ຮ່ວມ​ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ລາວ-ມຽນ​ມາ ມຽນ​ມາ-ລາວ ຄັ້ງ​ທີ 12 ຢູ່​ນະ­ຄອນ­ຫຼວງ​ວຽງ​ຈັນ ວັນ​ທີ 4-7 ມີ­ນາ​ນີ້.

    ກອງ​ປະ­ຊຸມ​ຄະ­ນະ​ກຳ­ມາ​ທິ​ການ​ຮ່ວມ ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ລາວ-ມຽນ​ມາ ມຽນ​ມາ-ລາວ ຄັ້ງ​ທີ 12 ຈັດ​ຂຶ້ນ​ວັນ​ທີ 6 ມີ­ນາ 2020 ຢູ່​ກະ­ຊວງ​ການ​ຕ່າງ­ປະ­ເທດ ໂດຍ​ເປັນ​ປະ­ທານ​ຂອງ​ທ່ານ ສະ­ເຫຼີມ​ໄຊ ກົມ​ມະ​ສິດ ແລະ ທ່ານ ອູ ຈໍ ຕິນ ເຊິ່ງ​ສອງ​ຝ່າຍ​ໄດ້​ຕີ​ລາ­ຄາ​ສູງ​ຕໍ່​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ອັນ​ດີ ລະ­ຫວ່າງ​ສອງ​ປະ­ເທດ ພ້ອມ​ທັງ​ສະ­ແດງ​ຄວາມ​ຊົມ­ເຊີຍ​ໃນ​ໂອ­ກາດ ຄົບ­ຮອບ 65 ປີ ແຫ່ງ​ການ​ສ້າງ­ຕັ້ງ​ສາຍ​ພົວ­ພັນ​ການ​ທູດ​ຮ່ວມ​ກັນ ລະ­ຫວ່າງ​ລາວ-ມຽນ​ມາ (12/7/1955-12/7/2020) ຕະ­ຫຼອດ 6 ທົດ​ສະ​ວັດ​ເຄິ່ງ​ຜ່ານ​ມາ ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື ລະ­ຫວ່າງ​ສອງ​ປະ­ເທດ​ໄດ້​ຮັບ​ການ​ສົ່ງ­ເສີມ​ໃຫ້​ຂະ­ຫຍາຍ­ຕົວ​ຢ່າງ​ບໍ່​ຢຸດ​ຢັ້ງ ເຫັນ​ໄດ້​ຈາກ​ການ​ແລກ­ປ່ຽນ​ການ​ຢ້ຽມ­ຢາມ​ຂອງ​ການ​ນຳ​ຂັ້ນ​ສູງ ລະ­ຫວ່າງ​ສອງ​ປະ­ເທດ​ຢ່າງ​ເປັນ​ປົກ­ກະ­ຕິ ພ້ອມ​ນີ້ ສອງ​ຝ່າຍ​ຍັງ​ໄດ້​ທົບ​ທວນ­ຄືນ​ການ​ພົວ­ພັນ​ຮ່ວມ​ມື​ຂອງ​ສອງ​ປະ­ເທດ​ໃນ​ໄລ­ຍະ​ຜ່ານ​ມາ ໂດຍ​ສະ­ເພາະ​ການ­ຈັດ­ຕັ້ງ​ຜັນ​ຂະ­ຫຍາຍ​ເນື້ອ​ໃນ​ບົດ​ບັນ­ທຶກ​ກອງ​ປະ­ຊຸມ​ຄະ­ນະ​ກຳ­ມະ­ການ​ຮ່ວມ ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ລາວ-ມຽນ​ມາ ມຽນ​ມາ-ລາວ ຄັ້ງ​ທີ 11 ຢູ່​ນະ­ຄອນ­ຫຼວງ​ເນ​ປິ​ດໍ ສສ ມຽນ​ມາ ວັນ​ທີ 1-4 ມີ­ນາ 2015 ໂດຍ​ມີ​ຫຼາຍ​ດ້ານ​ທີ່​ມີ​ຄວາມ​ຄືບ​ໜ້າ​ຢ່າງ​ເປັນ​ຮູບ​ປະ​ທຳ ນອກ​ນີ້ ຍັງ​ໄດ້​ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ​ໃນ​ການ​ຮ່ວມ​ມື​ຂະ­ແໜງ­ການ​ຕ່າງໆ ເຊັ່ນ: ຂະ­ແໜງ­ການ​ຕ່າງ­ປະ­ເທດ ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ເສດ­ຖະ­ກິດ-ການ​ຄ້າ ສຶກ​ສາ​ທິ​ການ ແລະ ກີ­ລາ ວັດ­ທະ­ນະ­ທຳ-ສັງ­ຄົມ ສາ­ສະ­ໜາ ແລະ ອື່ນໆ ນອກ­ຈາກ​ຂອບ​ການ​ຮ່ວມ​ມື​ສອງ​ຝ່າຍ​ແລ້ວ ຍັງ​ໄດ້​ສືບ­ຕໍ່​ໃຫ້­ການ​ສະ­ໜັບ­ສະ­ໜູນ​ເຊິ່ງ​ກັນ ແລະ ກັນ​ໃນ​ຂອບ​ການ​ຮ່ວມ​ມື​ພາກ​ພື້ນ ແລະ ສາ­ກົນ ເປັນ­ຕົ້ນ​ອາ​ຊຽນ ອະ­ນຸ​ພາກ​ພື້ນ​ແມ່­ນ້ຳ​ຂອງ ແມ່­ນ້ຳ​ອີ​ຣະ​ວະ​ດີ-ແມ່­ນ້ຳ​ເຈົ້າ​ພະ­ຍາ-ແມ່­ນ້ຳ​ຂອງ ກຳ­ປູ­ເຈຍ-ລາວ-ມຽນ​ມາ-ຫວຽດ­ນາມ ຂອບ​ການ​ຮ່ວມ​ມື​ແມ່­ນ້ຳ​ຂອງ ອົງ­ການ​ສະ­ຫະ​ປະ­ຊາ​ຊາດ ແລະ ອື່ນໆ​ເປັນ​ປົກ­ກະ­ຕິ.

    ສຳ­ລັບ​ທິດ​ທາງ​ການ​ຮ່ວມ​ມື​ໃນ​ອະ­ນາ­ຄົດ ສອງ​ຝ່າຍ​ເຫັນ​ດີ​ສືບ­ຕໍ່​ໃຫ້​ມີ​ການ​ແລກ­ປ່ຽນ​ຄະ­ນະ​ຜູ້​ແທນ​ນຳ​ກັນ​ທຸກ​ຂັ້ນ ທຸກ​ລະ­ດັບ ແລະ ທຸກ​ຂະ­ແໜງ­ການ​ແຕ່​ສູນ​ກາງ​ເຖິງ​ທ້ອງ­ຖິ່ນ​ເປັນ​ປົກ​ປະ­ຕິ ແລະ ຕໍ່​ເນື່ອງ ເພື່ອ​ສືບ­ຕໍ່​ຜັນ​ຂະ­ຫຍາຍ​ບົດ​ບັນ­ທຶກ​ແຜນ­ການ​ຮ່ວມ​ມື ລະ­ຫວ່າງ​ຂະ­ແໜງ­ການ​ກ່ຽວ­ຂ້ອງ ທີ່​ໄດ້​ລົງ​ນາມ​ຮ່ວມ​ກັນ​ແລ້ວ​ໃຫ້​ເກີດ​ດອກ​ອອກ​ຜົນ ສືບ­ຕໍ່​ຊອກ​ກາ­ລະ​ໂອ­ກາດ​ຮ່ວມ​ກັນ​ເພື່ອ​ສົ່ງ­ເສີມ​ການ­ທ່ອງ­ທ່ຽວ ລະ­ຫວ່າງ​ສອງ​ປະ­ເທດ ກໍ​ຄື ລະ­ດັບ​ອະ­ນຸ​ພາກ​ພື້ນ ແລະ ພາກ​ພື້ນ ເພື່ອ​ເປັນ​ການ​ເຜີຍ­ແຜ່​ຄວາມ​ສວຍ​ງາມ​ດ້ານ​ທຳ​ມະ​ຊາດ ຄວາມ​ຮັ່ງ­ມີ​ດ້ານ​ມໍ­ລະ­ດົກ ວັດ­ທະ­ນະ­ທຳ ພ້ອມ​ດຽວ​ກັນ ໃຫ້​ສົ່ງ­ເສີມ​ການ­ທ່ອງ­ທ່ຽວ ແລະ ການ​ໄປ-ມາ​ຫາ​ສູ່​ກັນ​ຂອງ​ປະ­ຊາ­ຊົນ​ສອງ​ປະ­ເທດ ເພື່ອ​ສ້າງ​ຄວາມ​ໃກ້­ຊິດ ແລະ ຄວາມ​ເຂົ້າ­ໃຈ​ກັນ​ໃຫ້​ຫຼາຍ​ຂຶ້ນ ພາຍ­ຫຼັງ​ສຳ­ເລັດ​ກອງ​ປະ­ຊຸມ ສອງ​ຝ່າຍ​ຍັງ​ໄດ້​ຮ່ວມ​ກັນ​ລົງ​ນາມ​ບົດ​ບັນ­ທຶກ​ກອງ​ປະ­ຊຸມ ພ້ອມ​ນີ້ ຝ່າຍ​ລາວ​ຍັງ​ໄດ້​ມອບ​ເງິນ​ມູນ​ຄ່າ 50.000 ໂດ​ລາ​ສະ­ຫະ­ລັດ ຫຼື ປະ­ມານ 444 ລ້ານ​ກີບ ໃຫ້​ຝ່າຍ​ມຽນ​ມາ ເພື່ອ​ປະ­ກອບ­ສ່ວນ​ຟື້ນ​ຟູ​ຊ່ວຍ­ເຫຼືອ​ປະ­ຊາ­ຊົນ​ລັດ​ຣະ​ຄ່າຍ ໃຫ້​ມີ​ຊີ­ວິດ​ການ​ເປັນ​ຢູ່​ດີ​ຂຶ້ນ ອີກ​ດ້ວຍ.

ຂ່າວທີ່ກ່ຽວຂ້ອງ