ເບິ່ງບ້ານເຂົາເອົາບົດຮຽນ 05-03-2020

1.750 05 ມ.ນ. 2020 ຫົວຂໍ້ຂ່າວອື່ນໆ

   ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ກ່ຽວ​ກັບ​ມາດ​ຕະ­ການ​ຕ້ານ​ການ​ສໍ້​ລາດ​ບັງ​ຫຼວງ​ຢູ່​ບູນ​ກາ​ຣີ ແລະ ຂໍ້​ຫ້າມ​ຄົນ​ຕ່າງ­ປະ­ເທດ​ທີ່​ມີ​ປະ­ຫວັດ​ໃຊ້​ຄວາມ​ຮຸນ​ແຮງ​ເຂົ້າ​ໄປ​ອົດ​ສະ​ຕຣາ​ລີ.

   ທີ່ ບູນ​ກາ​ຣີ: ກ່ອນ​ນີ້​ປະ­ມານ​ເກືອບ 5 ປີ ລັດ­ຖະ­ບານ​ຂອງ​ປະ­ເທດ​ບູນ​ກາ​ຣີ ໄດ້​ຮັບ­ຮອງ​ເອົາ​ແຜນ­ການ 5 ປີ ກ່ຽວ​ກັບ​ຍຸດ​ທະ​ສາດ​ແຫ່ງ​ຊາດ ໂດຍ​ເນັ້ນ​ການ​ປ້ອງ​ກັນ ແລະ ຕ້ານ​ບັນ­ຫາ​ສໍ້​ລາດ​ບັງ​ຫຼວງ ທີ່​ແຜ່​ລະ­ບາດ​ເປັນ​ໜອນ​ເຈາະ​ໄສ້​ຢູ່​ໃນ​ທຸກ​ລະ­ດັບ ແຜນ​ຍຸດ​ທະ​ສາດ​ແຫ່ງ​ຊາດ​ເພື່ອ​ຕ້ານ​ພະ­ຍາດ​ສໍ້​ລາດ​ບັງ​ຫຼວງ ໄດ້​ກຳ­ນົດ​ມາດ​ຕະ­ການ​ສະ­ເພາະ 33 ຂໍ້​ໃນ 6 ຂົງ­ເຂດ​ຕົ້ນ­ຕໍ ນັບ​ແຕ່​ຂັ້ນ​ສູງ​ສຸດ​ໃນ​ຂະ­ນະ​ລັດ­ຖະ­ບານ ເຊິ່ງ​ຖື​ເປັນ​ຂົງ­ເຂດ​ທີ 1 ສ່ວນ​ອີກ 5 ຂົງ­ເຂດ​ວຽກ​ທີ່​ຫຼຸດ​ລັ່ນ​ລົງ​ມາ​ກໍ​ມີ ການ​ສ້າງ­ຕັ້ງ​ລະ­ບົບ​ທີ່​ມີ​ປະ­ສິດ­ທິ­ພາບ​ໃນ​ການ​ຕ້ານ​ການ​ສໍ້​ລາດ​ບັງ​ຫຼວງ ການ​ຕ້ານ​ການ​ສໍ້​ລາດ​ບັງ​ຫຼວງ ດ້ານ​ການ­ເມືອງ ປ້ອງ​ກັນ​ບໍ່​ໃຫ້​ມີ​ການ​ສໍ້​ລາດ​ບັງ​ຫຼວງ​ໃນ​ຂະ­ແໜງ​ຍຸ­ຕິ​ທຳ ໃນ​ກະ­ຊວງ​ພາຍ​ໃນ ແລະ ອົງ­ການ​ກວດ­ກາ ລຶ­ບລ້າງ​ບັນ­ຫາ​ສໍ້​ລາດ​ບັງ​ຫຼວງ​ລະ­ດັບ​ຕ່ຳ​ທີ່​ເກີດ​ຂຶ້ນ​ໃນ​ຊີ­ວິດ​ປະ­ຈຳ​ວັນ ແລະ ອັນ​ທີ 5 ແມ່ນ​ການ​ສ້າງ​ເງື່ອນ­ໄຂ​ສິ່ງ­ແວ­ດລ້ອມ​ໃນ​ສັງ­ຄົມ ເພື່ອ​ບໍ່​ໃຫ້​ຍິນ​ຍອມ​ຕໍ່​ບັນ­ຫາ​ສໍ້​ລາດ​ບັງ​ຫຼວງ ແຜນ​ຍຸດ​ທະ​ສາດ​ດັ່ງ­ກ່າວ​ໄດ້​ໃຫ້​ຄວາມ​ສຳ­ຄັນ​ຕໍ່​ການ​ສ້າງ​ຂອບ​ລະ­ບົບ​ການ​ປົກ­ຄອງ​ທີ່​ມີ​ອຳ­ນາດ​ໃນ​ການ​ປ້ອງ​ກັນ​ລ່ວງ​ໜ້າ ແລະ ປາບ​ປາມ​ບັນ­ຫາ​ສໍ້​ລາດ​ບັງ​ຫຼວງ ນອກ­ຈາກ​ນັ້ນ ຍັງ​ຕ້ອງ​ເຮັດ​ໃຫ້­ການ​ປະ­ສານ​ງານ​ລະ­ຫວ່າງ​ໜ່ວຍ​ງານ​ກ່ຽວ­ຂ້ອງ​ມີ​ປະ­ສິດ­ທິ­ພາບ ແລະ ໂຮມ​ກັນ​ເປັນ​ອົງ​ການ­ຈັດ­ຕັ້ງ​ເອ­ກະ​ພາບ ເພື່ອ​ເຮັດ​ການ​ວິ­ໄຈ ສອບ​ສວນ​ກ່ຽວ​ກັບ​ຄວາມ​ຂັດ​ແຍ່ງ​ດ້ານ​ຜົນ​ປະ­ໂຫຍດ​ຂອງ​ກຸ່ມ​ບຸກ­ຄົນ​ໃນ​ຖາ­ນະ​ຕຳ­ແໜ່ງ​ສູງ​ຂອງ​ລັດ ທາງ​ການ​ບູນ​ກາ​ຣີ ວາງ​ເປົ້າ​ໝາຍ​ເອົາ​ໄວ້​ວ່າ ພາຍ​ໃນ​ປີ 2020 ຈະ​ຕ້ອງ​ເຮັດ​ໃຫ້​ລະ­ດັບ​ການ​ສໍ້​ລາດ​ບັງ​ຫຼວງ​ພາຍ​ໃນ​ປະ­ເທດ​ຫຼຸດ​ລົງ​ຢູ່​ໃນ​ລະ­ດັບ​ດຽວ​ກັບ​ບັນ­ດາ​ປະ­ເທດ​ສະ­ມາ­ຊິກ​ສະ­ຫະ­ພາບ​ເອີ​ຣົບ.

   ທີ່ ອົດ​ສະ​ຕຣາ​ລີ: ຂ່າວ​ໃນ​ຕົ້ນ​ເດືອນ​ມີ­ນາ 2019 ໃຫ້​ຮູ້​ວ່າ ທາງ​ການ​ອົດ​ສະ​ຕຣາ​ລີ ໄດ້​ປະ­ກາດ​ມາດ​ຕະ­ການ​ຫ້າມ​ນັກ​ທ່ອງ​ທ່ຽວ​ຕ່າງ­ປະ­ເທດ​ທີ່​ມີ​ປະ­ຫວັດ​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ​ເຂົ້າ​ປະ­ເທດ ການ​ປະ­ກາດ​ນີ້​ອອກ​ມາ​ຈາກ​ປາກ​ຂອງ​ທ່ານ ເດ​ວິດ ໂຄ​ເລ​ມານ ລັດ­ຖະ­ມົນ­ຕີ​ກິດ­ຈະ­ການ​ຍົກ­ຍ້າຍ​ທີ່­ຢູ່​ອາ­ໄສ ໂດຍ​ໄດ້​ບອກ​ວ່າ ອົດ​ສະ​ຕຣາ​ລີ ບໍ່​ຕ້ອນ­ຮັບ​ຊາວ​ຕ່າງ­ປະ­ເທດ​ທີ່​ຖືກ​ຕັດ­ສິນ​ວ່າ​ມີ​ຄະ­ດີ​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ​ຕໍ່​ແມ່­ຍິງ ແລະ ເດັກ­ນ້ອຍ​ມາ​ແລ້ວ ມາດ​ຕະ­ການ​ທີ່​ວ່າ​ນີ້​ອະ­ນຸ­ຍາດ​ໃຫ້​ຍົກ­ເລີກ​ວີ​ຊາ​ຂອງ​ນັກ​ທ່ອງ​ທ່ຽວ​ຕ່າງ­ປະ­ເທດ ທີ່​ຂໍ​ເຂົ້າ​ເມືອງ ຖ້າ­ວ່າ ຜູ້­ກ່ຽວ​ຖືກ​ສານ​ຕັດ­ສິນ​ຈຳ​ຄຸກ ແຕ່12 ເດືອນ​ຂຶ້ນ​ໄປ ໃນ​ຄະ­ດີ​ໃຊ້​ຄວາມ​ຮຸນ​ແຮງ​ຕໍ່​ແມ່­ຍິງ ແລະ ເດັກ­ນ້ອຍ​ພາຍ​ໃນ​ຄອບ­ຄົວ ຂ່າວ​ໃຫ້​ຮູ້​ຕື່ມ​ວ່າ ຜ່ານ​ມາ ທາງ​ການ​ອົດ​ສະ​ຕຣາ​ລີ ໄດ້​ປະ­ຕິ­ເສດ​ວີ​ຊາ​ສຳ­ລັບ​ຄົນ​ທີ່​ມີ​ຊື່​ສຽງ​ໂດ່ງ​ດັງ 2 ຄົນ ຈາກ​ສະ­ຫະ­ລັດ​ອາ​ເມ​ຣິ​ກາ ມາ​ແລ້ວ ຍ້ອນ​ທັງ​ສອງ​ເຄີຍ​ມີ​ຄະ­ດີ​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ ທັງ​ສອງ​ຄົນ​ທີ່​ວ່າ​ນັ້ນ​ມີ ທ້າວ ຄຼິດ ບຣາວ ນັກ​ຮ້ອງ​ຊື່​ດັງ ແລະ ນັກ​ມວຍ​ລະ­ດັບ​ແຊມ ຊື່ ທ້າວ ຟະ​ລອຍ ເມ​ເວດ​ເທີ.

   ມາດ​ຕະ­ການ​ຫ້າມ​ນັກ​ທອງ​ທ່ຽວ​ຊາວ​ຕ່າງ­ປະ­ເທດ​ທີ່​ມີ​ຄະ­ດີ​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ​ເຂົ້າ​ປະ­ເທດ​ນີ້​ໄດ້​ມີ​ຜົນ​ບັງ­ຄັບ​ໃຊ້​ແຕ່​ວັນ​ທີ 28 ກຸມ­ພາ 2009 ເປັນ­ຕົ້ນ​ມາ.

ຂ່າວທີ່ກ່ຽວຂ້ອງ