ເບິ່ງບ້ານເຂົາເອົາບົດຮຽນ 04-03-2020

2.014 04 ມ.ນ. 2020 ຫົວຂໍ້ຂ່າວອື່ນໆ

    ໃນ​ບັນ­ຍາ­ກາດ​ປິ່ນ​ອ້ອມ​ວັນ​ແມ່­ຍິງ​ສາ­ກົນ (8 ມີ­ນາ) ນີ້ ຄໍ​ລຳ​ໄດ້​ສັງ​ລວມ​ເອົາ​ຂ່າວ​ມາດ​ຕະ­ການ​ລົງ­ໂທດ​ໃນ​ຄະ­ດີ​ລວນ​ລາມ​ທາງ​ເພດ​ຕໍ່​ເດັກ​ຍິງ ແລະ ແມ່­ຍິງ ໃນ​ມາ​ເລ​ເຊຍ ອົດ​ສະ​ຕຣາ​ລີ ແລະ ອິນ​ເດຍ ມາ​ຕ້ອນ​ທ່ານ​ຜູ້​ອ່ານ​ດັ່ງ​ລຸ່ມ​ນີ້:

    ທີ່ ມາ​ເລ​ເຊຍ: ມີ​ເລື່ອງ​ສະ​ຍົດ​ສະ­ຫຍອງ​ທີ່​ເປັນ​ຂ່າວ​ຈາກ​ມາ​ເລ​ເຊຍ ເມື່ອ​ເກືອບ 3 ປີ​ກ່ອນ​ໜ້າ​ນີ້ (ວຽງ​ຈັນ​ທາມ 14 ພະ­ຈິກ 2017) ກ່ຽວ​ກັບ​ແມ່​ໃຈ​ໂຫດ​ບັງ­ຄັບ​ໃຫ້​ລູກ​ສາວ​ສອງ​ຄົນ​ອາ­ຍຸ 10 ປີ ແລະ 13 ປີ ມີ​ເພດ​ສຳ­ພັນ​ກັບ​ຄົນ​ຕ່າງ­ປະ­ເທດ ເພື່ອ​ແລກ​ກັບ​ເງິນ ລາຍ​ລະ­ອຽດ​ຂອງ​ຂ່າວ​ບອກ​ວ່າ ເຫດ­ການ​ນີ້​ເກີດ​ຂຶ້ນ​ຢູ່​ໂຈ​ຮໍ ບາ​ຣູ (Johor Baru) ບ່ອນ​ທີ່​ແມ່​ໃຈ​ໂຫດ​ອາ­ຍຸ 39 ປີ ທີ່​ກໍ່​ເຫດ​ນັ້ນ ໄດ້​ບັງ­ຄັບ​ລູກ​ສາວ 2 ຄົນ​ຂອງ​ຕົນ​ເອງ​ຂາຍ​ຕົວ​ແລກ​ເງິນ​ກັບ​ຊາຍ​ຊາວ​ບັງ​ກະ­ລາ​ເທດ ທີ່​ອອກ­ແຮງ​ງານ​ຢູ່​ທີ່​ນັ້ນ ຈຳ­ນວນ 5 ຄັ້ງ ທີ່​ແຕກ​ຕ່າງ​ກັນ ໃນ​ລະ­ຫວ່າງ​ວັນ​ທີ 1-7 ເດືອນ​ຕຸ­ລາ ປີ 2017 ເພື່ອ​ເງິນ​ຕອບ​ແທນ 50 ລິງ​ກິດ/ຄັ້ງ ສ່ວນ​ຜູ້​ເປັນ​ລູກ​ເອງ​ນັ້ນ​ໄດ້​ຮັບ​ເງິນ​ສ່ວນ​ແບ່ງ​ໃນ​ຈຳ­ນວນ 1-20 ຣິງ​ກິດ ໃນ​ທີ່​ສຸດ​ການ​ກະ­ທຳ​ຂອງ​ຜູ້​ເປັນ​ແມ່​ໃຈ​ໂຫດ​ຄົນ​ນີ້​ກໍ​ບໍ່​ມົ້ມ​ສາຍ­ຕາ​ກົດ­ໝາຍ ໂດຍ​ຜູ້­ກ່ຽວ​ຖືກ​ສານ​ຕັດ­ສິນ​ລົງ­ໂທດ​ຈຳ​ຄຸກ​ເປັນ​ເວ­ລາ 150 ປີ ໃນ​ຄວາມ​ຜິດ 10 ເລື່ອງ.

    ທີ່ ອົດ​ສະ​ຕຣາ​ລີ: ມາດ​ຕະ­ການ​ລົງ­ໂທດ​ຢ່າງ​ໜັກ ຕໍ່​ຜູ້​ກໍ່​ຄະ­ດີ​ລະ­ເມີດ​ທາງ​ເພດ​ຕໍ່​ເດັກ ໄດ້​ເຮັດ​ໃຫ້​ອົດ​ສະ​ຕຣາ​ລີ ເປັນ 1 ໃນ​ບັນ­ດາ​ປະ­ເທດ​ນຳ​ໜ້າ​ພາ​ທາງ​ຂອງ​ໂລກ​ໃນ​ການ​ປາບ​ປາມ​ອາ​ຊະ​ຍາ​ກຳ​ທາງ​ເພດ​ຕໍ່​ເດັກ ມາດ​ຕະ­ການ​ເພີ່ມ​ໂທດ​ໜັກ​ຂຶ້ນ​ນີ້​ໄດ້​ປະ­ກາດ​ອອກ​ມາ​ໃນ​ຕົ້ນ​ເດືອນ​ກັນ­ຍາ ປີ 2017 (ໜັງ­ສື­ພິມ The Nation ວັນ​ທີ 13 ກັນ­ຍາ 2017) ຂ່າວ​ບອກ​ວ່າ ທ່ານ​ໄມ​ເກິນ ຄີ​ແນນ (Michael Keenan) ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ​ໃນ​ເວ­ລາ​ນັ້ນ ໄດ້​ອອກ​ປະ­ກາດ​ເປັ້ງໆ​ວ່າ ມາດ​ຕະ­ການ​ໃໝ່​ທາງ​ກົດ­ໝາຍ​ຈະ​ລົງ­ໂທດ​ໜັກ­ໜ່ວງ​ຂຶ້ນ​ຕໍ່​ບັນ­ດາ​ຜູ້​ບໍ­ລິ­ການ​ເຄືອ​ຄ່າຍ​ອິນ​ເຕີ​ເນັດ​ທີ່​ເຜີຍ­ແຜ່​ເນື້ອ​ໃນ ພາບ ທີ່​ເປັນ​ການ​ລະ­ເມີດ​ທາງ​ເພດ​ຕໍ່​ເດັກ ຜູ້​ກະ­ທຳ​ຜິດ​ຈະ​ໄດ້​ຮັບ​ໂທດ​ໜັກ­ໜ່ວງ​ຂຶ້ນ​ຕື່ມ ຖ້າ​ພວກ​ເຂົາ​ເຊື່ອງ­ອຳ​ບໍ່​ລາຍ​ງານ​ເລື່ອງ​ນີ້​ໃຫ້​ເຈົ້າ​ໜ້າ­ທີ່​ຊາບ ມາດ​ຕະ­ການ​ລົງ­ໂທດ​ນັ້ນ​ລວມ​ມີ ການ​ປັບ​ໃໝ ແລະ ໂທດ​ຕັດ​ອິດ­ສະ­ຫຼະ­ພາບ ໂດຍ​ໂທດ​ປັບ​ໃໝ​ນັ້ນ​ໄດ້​ເພີ່ມ​ຂຶ້ນ​ຈາກ​ຈຳ­ນວນ​ເງິນ 21.000 ເປັນ 168.000 ໂດ​ລາ​ອົດ​ສະ​ຕຣາ​ລີ ມາດ​ຕະ­ການ​ເພີ່ມ​ໂທດ​ນີ້ ເປົ້າ​ໝາຍ​ປາບ​ປາມ​ອາ​ຊະ​ຍາ​ກຳ​ທາງ​ອິນ​ເຕີ​ເນັດ ທີ່​ເປັນ​ການ​ລະ­ເມີດ​ເລື່ອງ​ເພດ​ຕໍ່​ເດັກ ທ່ານ​ລັດ­ຖະ­ມົນ­ຕີ​ສະ­ແດງ​ຄວາມ​ບໍ່​ພໍ­ໃຈ​ຕໍ່​ມາດ​ຕະ­ການ​ລົງ­ໂທດ​ອາ​ຊະ​ຍາ​ກຳ​ປະ­ເພດ​ນີ້ ໃນ​ເມື່ອ​ກ່ອນ​ທີ່​ທ່ານ​ເຫັນ​ວ່າ​ຍັງ​ອ່ອນ­ໂຍນ​ເກີນ​ໄປ.

    ທີ່ ອິນ​ເດຍ: ເຊັ່ນ​ດຽວ​ກັນ ຢູ່​ອົດ​ສະ​ຕຣາ​ລີ ທາງ​ການ​ອິນ​ເດຍ ກໍ​ໄດ້​ເອົາ​ມາດ​ຕະ­ການ​ເພີ່ມ​ໂທດ​ຕໍ່​ຜູ້​ກໍ່​ຄະ­ດີ​ຂົ່ມ­ຂືນ​ຝືນ​ໃຈ​ເດັກ ກໍ​ຄື ອາ​ຊະ​ຍາ​ກຳ​ທາງ​ເພດ​ຕໍ່​ແມ່­ຍິງ​ອິນ​ເດຍ ເຊິ່ງ​ມັກ​ຈະ​ກາຍ­ເປັນ​ຂ່າວ​ອ່າວ​ຖີ່​ໃນ​ຊຸມ​ປີ​ຫຼັງໆ​ມາ​ນີ້ ຂ່າວ​ວຽງ​ຈັນ​ທາມ (23/4/2018) ບອກ​ວ່າ ໃນ​ວັນ​ທີ 21 ເມ­ສາ 2018 ລັດ­ຖະ­ບານ​ອິນ​ເດຍ ໄດ້​ຕົກ­ລົງ​ຮັບ­ຮອງ​ເອົາ​ບົດ​ລົງ­ໂທດ​ປະ­ຫານ​ຊີ­ວິດ​ສຳ­ລັບ​ຜູ້​ຂົ່ມ­ຂືນ​ເດັກ​ຍິງ​ອາ­ຍຸ​ຕ່ຳ​ກວ່າ 12 ປີ ມາດ​ຕະ­ການ​ລົງ­ໂທດ​ນີ້​ໄດ້​ລະ­ບຸ​ໄວ້​ໃນ​ກົດ­ໝາຍ​ອາ­ຍາ​ສະ­ບັບ​ປັບ­ປຸງ ນອກ­ຈາກ​ໂທດ​ປະ­ຫານ​ຕໍ່​ຜູ້​ຂົ່ມ­ຂືນ​ເດັກ​ຍິງ​ອາ­ຍຸ​ຕ່ຳ​ກວ່າ 12 ປີ​ແລ້ວ ກົດ­ໝາຍ​ຍັງ​ໄດ້​ເພີ່ມ​ໂທດ​ຕໍ່​ຜູ້​ກໍ່​ຄະ­ດີ​ຂົ່ມ­ຂືນ​ໃຫ້​ໜັກ​ຂຶ້ນ ຄື: ເພີ່ມ​ໂທດ​ຕໍ່​ຜູ້​ຂົ່ມ­ຂືນ​ເດັກ​ຍິງ​ອາ­ຍຸ​ຕ່ຳ​ກວ່າ 16 ປີ ຈາກ​ໂທດ​ຈຳ​ຄຸກ 10 ປີ ມາ​ເປັນ 20 ປີ ແລະ ເພີ່ມ​ໂທດ​ຈຳ​ຄຸກ​ຈາກ 7 ປີ ມາ​ເປັນ 10 ປີ ສຳ­ລັບ​ຄວາມ​ຜິດ​ຖານ​ຂົ່ມ­ຂືນ​ແມ່­ຍິງ​ທົ່ວ​ໄປ.

ຂ່າວທີ່ກ່ຽວຂ້ອງ