ເບີ່ງບ້ານເຂົາເອົາບົດຮຽນ 03-03-2020

1.991 03 ມ.ນ. 2020 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ກ່ຽວ​ກັບ​ບັນ­ຫາ​ມົນ​ລະ​ພິດ​ທີ່​ຫວຽດ­ນາມ ເລື່ອງ​ການ​ເນ­ລະ­ເທດ​ຊາວ​ຕ່າງ­ປະ­ເທດ ທີ່​ເຂົ້າ​ເມືອງ​ຜິດ​ກົດ  ໝາຍ ຢູ່​ມາ​ເລ​ເຊຍ ແລະ ເລື່ອງ​ການ​ເຝົ້າ​ລະ­ວັງ​ພະ­ຍາດ​ປອດ​ອັກ­ເສບ ໄວ​ຣັດ ໂຄ​ໂຣ​ນາ ຢູ່​ເດີ່ນ​ບິນ​ສິງ­ກະ­ໂປ.

    ທີ່​ຫວຽດ­ນາມ: ຂ່າວ​ຕ່າງ­ປະ­ເທດ ຈາກ​ຫວຽດ­ນາມ ຫວ່າງ​ບໍ່​ດົນ​ມາ​ນີ້ ໄດ້​ເວົ້າ​ເຖິງ​ບັນ­ຫາ​ຜົນ​ກະ­ທົບ​ຈາກ​ສະ­ພາບ​ສິ່ງ­ແວ­ດລ້ອມ​ໃນ​ບັນ­ດາ​ຕົວ​ເມືອງ​ໃຫຍ່ ເຊັ່ນ: ນະ­ຄອນ­ຫຼວງ​ຮ່າ​ໂນ້ຍ ແລະ ນະ­ຄອນ​ໂຮ່​ຈີ​ມິງ ທີ່​ມີ​ການ​ຜັນ​ແປ​ຢ່າງ​ໜັກ­ໜ່ວງ ເຖິງ​ຂັ້ນ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ​ໄດ້​ອອກ​ມາ​ຮຽກ­ຮ້ອງ​ໃຫ້​ທາງ​ການ​ຂອງ​ເຂດ​ທ້ອງ­ຖິ່ນ​ໃນ​ທົ່ວ​ປະ­ເທດ​ຕິດ­ຕາມ​ກວດ­ກາ ຄວບ​ຄຸມ​ໂຮງ​ຈັກ ໂຮງ­ງານ ກໍ​ຄື ສະ­ຖານ­ທີ່​ປະ­ກອບ​ການ​ຕ່າງໆ ທີ່​ປ່ອຍ​ອາຍ​ພິດ-ທາດ​ເຄ​ມີ​ທີ່​ເປັນ​ອັນ­ຕະ­ລາຍ ເຊິ່ງ​ຕັ້ງ​ຢູ່​ໃນ​ບັນ­ດາ​ຕົວ​ເມືອງ ເພື່ອ​ຮີບ​ຮ້ອນ​ຍົກ­ຍ້າຍ​ອອກ​ຈາກ​ຍ່ານ​ໃຈ​ກາງ­ຂອງ​ຕົວ​ເມືອງ ທ່ານ ເຈິນ ຮົງ​ຮາ ລັດ­ຖະ­ມົນ­ຕີ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ໄດ້​ກ່າວ​ກ່ຽວ​ກັບ​ບັນ­ຫາ​ນີ້​ວ່າ ບັນ­ຫາ​ມົນ​ລະ​ພິດ​ທາງ​ອາ­ກາດ​ໃນ​ນະ­ຄອນ­ຫຼວງ​ຮ່າ​ໂນ້ຍ ແລະ ນະ­ຄອນ​ໂຮ່​ຈີ​ມິງ​ນັ້ນ ໄດ້​ເສື່ອມ​ໂຊມ​ລົງ​ຢ່າງ​ຕໍ່​ເນື່ອງ ທັງໆ​ທີ່​ທາງ​ການ​ໄດ້​ນຳ​ໃຊ້​ມາດ​ຕະ­ການ​ຕ່າງໆ​ເພື່ອ​ແກ້​ໄຂ ນັບ​ແຕ່​ເດືອນ​ກັນ­ຍາ ປີ 2019 ເປັນ­ຕົ້ນ​ມາ ຄຸນ​ນະ​ພາບ​ຂອງ​ອາ­ກາດ​ໃນ​ນະ­ຄອນ­ຫຼວງ​ຮ່າ​ໂນ້ຍ​ໄດ້​ເລີ່ມ​ຕົກ­ຕ່ຳ​ລົງ​ສູ່​ລະ­ດັບ​ເປັນ​ອັນ­ຕະ­ລາຍ​ຕໍ່​ສຸ­ຂະ­ພາບ ບັນ­ຫາ​ມົນ​ລະ​ພິດ​ທາງ​ອາ­ກາດ​ນັ້ນ​ໄດ້​ເລີ່ມ​ແຜ່​ກະ­ຈາຍ​ມາ​ຈາກ​ທາງ​ພາກ​ເໜືອ​ຂອງ​ປະ­ເທດ ເຊັ່ນ: ຮາຍ​ຟອງ ກວາງ​ນິນ ແລະ ໄທ ຫງວຽນ ເຊິ່ງ​ເປັນ​ທີ່​ຕັ້ງ​ຂອງ​ໂຮງ­ງານ​ພະ­ລັງ­ງານ​ຖ່ານ​ຫີນ.

    ທີ່​ມາ​ເລ​ເຊຍ: ຂ່າວ​ໃນ​ທ້າຍ​ເດືອນ​ທັນ­ວາ ປີ 2019 ໃຫ້​ຮູ້​ວ່າ ທາງ​ການ​ຂອງ​ເມືອງ​ໂກ​ຕາ​ກີ​ນາ​ບາ​ລູ ລັດ​ຊາ​ບາ ປະ­ເທດ​ມາ​ເລ​ເຊຍ ໄດ້​ຈັດ​ສົ່ງ​ຊາວ​ຕ່າງ­ປະ­ເທດ ຈຳ­ນວນ 882 ຄົນ ກັບ​ຄືນ​ປະ­ເທດ​ຖິ່ນ​ເດີມ​ຂອງ​ເຂົາ­ເຈົ້າ ຊາວ​ຕ່າງ­ປະ­ເທດ​ທີ່​ຖືກ​ເນ­ລະ­ເທດ​ຄັ້ງ​ນີ້​ບໍ່​ມີ​ເອ­ກະ­ສານ​ຖືກ­ຕ້ອງ​ຕາມ​ກົດ­ໝາຍ ຂ່າວ​ບອກ​ວ່າ ຂະ​ບວນ​ການ​ເນ­ລະ­ເທດ​ຄັ້ງ​ນີ້ ແມ່ນ​ສ່ວນ​ໜຶ່ງ​ຂອງ​ຄວາມ​ພະ­ຍາ­ຍາມ​ຂອງ​ທາງ​ການ ເກາະ ຊາ​ບາ ໃນ​ການ​ກຳ­ຈັດ​ບັນ­ຫາ​ຄົນ​ເຂົ້າ​ເມືອງ ໂດຍ​ບໍ່​ມີ​ເອ­ກະ­ສານ​ຖືກ­ຕ້ອງ​ຕາມ​ກົດ­ໝາຍ ທ່ານ ຊາ​ຣີ​ຟາ ຊິດ​ຕິ ຊາ​ເລ​ຮາ ຮາ​ບິບ ຢູ​ຊົວ ຫົວ­ໜ້າ​ໜ່ວຍ​ງານ​ຄວາມ​ໝັ້ນ­ຄົງ​ຂອງ​ລັດ​ຊາ​ບາ ບອກ​ວ່າ ຊາວ​ຕ່າງ­ປະ­ເທດ​ທີ່​ຖືກ​ເນ­ລະ­ເທດ​ຄັ້ງ​ນີ້ ລວມ​ມີ​ຄົນ​ຟີ​ລິບ​ປິນ ຈຳ­ນວນ 763 ຄົນ ສ່ວນ​ເຫຼືອ​ອີກ 119 ຄົນ ແມ່ນ​ຄົນ​ອິນ​ໂດ​ເນ​ເຊຍ ໃນ​ຊຸມ​ປີ​ຫຼັງໆ​ມາ​ນີ້ ມາ​ເລ​ເຊຍ​ໄດ້​ເອົາ​ມາດ​ຕະ­ການ​ເດັດ­ຂາດ​ກັບ​ຄົນ​ເຂົ້າ​ເມືອງ​ທີ່​ຜິດ​ກົດ­ໝາຍ ແນ­ໃສ່​ແກ້​ໄຂ​ບັນ­ຫາ​ແຮງ​ງານ​ເຖື່ອນ​ທີ່​ເຂົ້າ​ໄປ​ຍາດ​ອາ­ຊີບ​ຄົນ​ທ້ອງ­ຖິ່ນ ທັງ​ເຮັດ​ໃຫ້​ເງິນ­ຕາ​ຂອງ​ມາ​ເລ​ເຊຍ​ຮົ່ວ​ໄຫຼ​ອອກ​ນອກ​ປະ­ເທດ​ຢ່າງ​ຫຼວງ­ຫຼາຍ​ໃນ​ແຕ່​ລະ​ປີ.

    ທີ່​ສິງ­ກະ­ໂປ: ຕໍ່​ໜ້າ­ການ​ແຜ່​ລະ­ບາດ​ຂອງ​ເຊື້ອ​ພະ­ຍາດ​ປອດ​ອັກ­ເສບ​ຮຸນ​ແຮງ ຫຼື ອັນ​ທີ່​ເອີ້ນ​ກັນ​ວ່າ ໄວ​ຣັດ ໂຄ​ໂຣ​ນາ (ໂຄ​ວິດ-19) ນັ້ນ ທຸກໆ​ປະ­ເທດ​ໃນ​ໂລກ​ໄດ້​ນຳ​ໃຊ້​ມາດ​ຕະ­ການ​ຕິດ­ຕາມ​ກວດ​ເຊັກ​ຜູ້­ໂດຍ­ສານ ເຂົ້າ​ປະ­ເທດ​ຈາກ​ເຂດ​ຕິດ­ຕາມ​ກວດ​ເຊັກ​ຜູ້­ໂດຍ­ສານ​ເຂົ້າ​ປະ­ເທດ​ຈາກ​ເຂດ​ເຊື້ອ​ໂລກ­ລະ­ບາດ ຢູ່​ເມືອງ​ອູ​ຮັ່ນ ສປ ຈີນ ສຳ­ລັບ​ຢູ່​ສິງ­ກະ­ໂປ​ແລ້ວ ການ​ຕິດ­ຕາມ​ກວດ­ກາ​ອຸນ­ຫະ­ພູມ​ຮ່າງ­ກາຍ​ຂອງ​ຜູ້­ໂດຍ­ສານ​ເຂົ້າ​ປະ­ເທດ​ຈາກ​ເຂດ​ລະ­ບາດ​ຂອງ​ຈຸ​ລະ​ໂລກ ປອດ​ອັກ­ເສບ ໄດ້​ເລີ່ມ​ຂຶ້ນ​ແຕ່​ວັນ​ທີ 3 ເດືອນ​ມັງ­ກອນ​ປີ​ນີ້ ເປັນ­ຕົ້ນ​ມາ ຢູ່​ສະ­ໜາມ​ບິນ​ສາ­ກົນ​ຊັງ​ກີ ການ​ກວດ​ເຊັກ​ອຸນ­ຫະ­ພູມ​ນີ້​ໄດ້​ກວມ​ເອົາ​ທັງ​ຜູ້​ທີ່​ເຄີຍ​ໄປ​ເມືອງ​ອູ​ຮັ່ນ 14 ວັນ ກ່ອນ​ການ​ລະ­ບາດ​ຂອງ​ເຊື້ອ​ພະ­ຍາດ ຂ່າວ​ບອກ​ວ່າ ຜູ້​ທີ່​ຖືກ​ກວດ​ວ່າ​ມີ​ອຸນ­ຫະ­ພູມ​ຜິດ​ປົກ­ກະ­ຕິ​ນັ້ນ ໄດ້​ຖືກ​ສົ່ງ​ໄປ​ໂຮງ­ພະ­ຍາ­ບານ​ເພື່ອ​ຕິດ­ຕາມ​ອາ­ການ​ຢ່າງ​ລະ­ອຽດ ສ່ວນ​ຢູ່​ອາ­ຄານ​ສະ­ໜາມ​ບິນ​ແຫ່ງ​ນີ້​ນັ້ນ ກໍ​ເຕັມ​ໄປ​ດ້ວຍ​ປ້າຍ​ແນະ­ນຳ​ກ່ຽວ​ກັບ​ບັນ­ຫາ​ສຸ­ຂະ­ພາບ​ສະ­ເພາະ​ຜູ້­ໂດຍ­ສານ​ຂາ​ເຂົ້າ​ຈາກ​ອູ​ຮັ່ນ.

ຂ່າວທີ່ກ່ຽວຂ້ອງ