ວິທີ​ປ້ອງ​ກັນ​ໄວ​​ຣັສ COVID-2019

6.473 02 ມ.ນ. 2020 ຫົວຂໍ້ຂ່າວອື່ນໆ
ວິທີ​ປ້ອງ​ກັນ​ໄວ​​ຣັສ COVID-2019

    ເວລາ​ນີ້ ຄົງ​ບໍ່​ມີ​ໃຜ​ບໍ່​ຮູ້ຈັກ  “ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ 2019”  ຫຼື​ຊື່​ທາງ​ການ​ວ່າ  “Covid-19” ທີ່​ກຳລັງ​ລະບາດ​ໜັກ​ຢູ່​ຂະນະ​ນີ້ ກຸ່ມ​ໄວ​​ຣັສ​ໂຄ​ໂຣ​ນາ​ນັ້ນ ຖືກ​ຄົ້ນ​ພົບ​​ຄັ້ັ້ງ​ທຳ​ອິດ​ເມື່ອ​ປະມານ​ປີ 1960 ເຮັດ​ໃຫ້​ເກີດ​ໄຂ້​ຫວັດ​ທົ່ວ​ໄປ ແຕ່​ບໍ່​ໄດ້​ມີ​ອາການ​ຮຸນ​ແຮງ​ຫຼາຍ ຫຼ້າ​ສຸດ​ພົບ​ທີ່​ເມືອງ​ອູ​ຮັ່ນ ມົນທົນ​ຫູ​ເປ່ ປະເທດ​ຈີນ ໃນ​ເດືອນ​ທັນວາ​ປີ 2019 ທີ່​ຜ່ານ​ມາ ເຊິ່ງ​ເປັນ​ສາຍ​ພັນ​ໃໝ່​ຕ່າງ​ຈາກ​ທີ່​ເຄີຍ​ພົບ​ເຫັນ​ມາ​ກ່ອນ ມີ​ອາການ​ຕັ້ງແຕ່​ເລັກ​ນ້ອຍ ປານ​ກາງ ເຖິງ​ຮຸນ​ແຮງ ແລະ ມີ​ການ​ແຜ່​ກະຈາຍ​ເຊື້ອ​ໄດ້.

ໂຄ​ໂຣ​ນາ ຄື​ອັນ​ໃດ ?

    ໂຄ​ໂຣ​ນາ ຄື​ເຊື້ອ​ໄວ​​ຣັສ​ທີ່​ມີ​ຮູບ​ຮ່າງ​ຄ້າຍ​ມົງ​ກຸດ ພົບ​ຄັ້ງ​ທຳ​ອິດ​ກາງ​ທົດ​ສະ​ວັດ​ທີ 1960 ໂດຍ​ມີ​ເຊື້ອ​ໄວ​​ຣັສ​ໂຄ​ໂຣ​ນາ​ຢູ່ 4 ສາຍ​ພັນ​ໃຫຍ່ໆ​ດ້ວຍ​ກັນ ແຕ່​ຕົວ​ທີ່​ລະບາດ​ຫຼາຍ​ທີ່​ສຸດ​ຄື SARS-CoV ພົບ​ຄັ້ງ​ທຳ​ອິດ​ທີ່​ປະເທດ​ຈີນ ປີ 2002-2003 ເຊິ່ງ​ໄດ້​ລະບາດ​ໄປ​ທົ່ວ​ໂລກ ແລະ ມີ​ອັດຕາ​ການ​ເສຍ​ຊີວິດ​ສູງ ຕໍ່​ມາ​ພົບ​ເຊື້ອ​ໄວ​​ຣັສ​ໂຄ​ໂຣ​ນາ​ສາຍ​ພັນ MERS-CoV ເກີດ​ຂຶ້ນ​ຄັ້ງ​ທຳ​ອິດ​ໃນ​ປະເທດ​ຊາ​ອຸ​ດີ​ອາ​ຣະ​ເບຍ ໃນ​ແຖບ​ຕາເວັນ​ອອກ​ກາງ.

    ຈົນ​ເຖີງ​ຫຼ້າ​ສຸດ ພົບ​ເຊື້ອ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ 2019 ຫຼື Covid-19  ທີ່​ເມືອງ​ອູ​ຮັ່ນ ເມືອງ​ຫຼວງ​ມົນທົນ​ຫູ​ເປ່ ພາກ​ກາງຂອງ​ປະເທດ​ຈີນ ໂດຍ​ບໍລິເວນ​ທີ່​ພົບ​ຜູ້​ປ່ວຍ​ຫຼາຍ​ທີ່​ສຸດ ແລະ ຄາດ​ວ່າ​ໜ້າ​ຈະ​ເປັນ​ຮັງ​ຂອງ​ໂຣກ ຄື​ຕະຫຼາດ​ອາຫານ​ທະເລ ແລະ ສັດ​ຫາ​ຍາກ​ໃນ​ເມືອງ ເຊິ່ງ​ໄດ້​ແຜ່​ກະຈາຍ​ໄປ​ໃນ​ຫຼາຍ​ເມືອງ​ໃນ​ປະເທດ​ຈີນ ແລະ ຫຼາຍໆ​ປະເທດ.

ວິທີ​ສັງເກດ​ອາການ

    ຫາກ​ໄດ້​ຮັບ​ເຊື້ອ​ໄວ​​ຣັສ Covid-19  ຜູ້​ປ່ວຍ​ຈະ​ເລີ່ມ​ສະແດງ​ອາການ​ອອກ​ມາ​ພາຍ​ໃນ 1 ວັນ ເຖິງ 2 ອາທິດ ຫຼັງ​ຈາກ​ໄດ້​ຮັບ​ເຊື້ອ ໂດຍ​ອາການ​ເລີ່ມ​ຕົ້ນ​ຂອງ​ຜູ້​ປ່ວຍ​ທີ່​ຕິດເຊື້ອ​ໄວ​​ຣັສ Covid-19 ນັ້ນ ສ່ວນ​ໃຫຍ່​ຈະ​ເລີ່ມ​ຈາກ​ການ​ມີ​ອາການ​ໄຂ້ ໄອ ເຈັບຄໍ ອ່ອນເພຍ ປວດ​ເມື່ອຍ​ຕົນ​ຕົວ ຫາຍໃຈ​ຫອບ​ເມື່ອຍ ຖ່າຍ​ແຫຼວ ຖອກທ້ອງ ຫາກ​ຜູ້​ປ່ວຍ​ມີ​ຮ່າງກາຍ​ບໍ່​ແຂງແຮງ ຫຼື​ມີ​ພູມ​ຕ້ານທານ​ຕ່ຳ ຈະ​ເຮັດ​ໃຫ້​ມີ​ຄວາມ​ຮຸນ​ແຮງ​ເຖິງ​ຂັ້ນ​ວິ​ກິດ ແລະ ເສຍ​ຊີວິດ​ໄດ້.

ວິທີ​ປ້ອງ​ກັນ

     ເບື້ອງ​ຕົ້ນ​ທຸກ​ຄົນ​ສາມາດ​ປ້ອງ​ກັນ​ຕົວ​ເອງ ແລະ ຄົນ​ອ້ອມ​ຂ້າງ​ໃຫ້​ຫ່າງ​ໄກ​ຈາກ​ເຊື້ອ​ໄວ​​ຣັສ Covid-19   ໄດ້​ດັ່ງນີ້:

    – ຫຼີກ​ລ່ຽງ​ການ​ໃກ້ຊິດ​ກັບ​ຜູ້​ປ່ວຍ​ທີ່​ມີ​ອາການ​ໄອ ຈາມ ນ້ຳ​ມູກ​ໄຫຼ ອິດເມື່ອຍ ເຈັບຄໍ

    – ຫຼີກ​ລ່ຽງ​ການ​ເດີນທາງ​ໄປ​ໃນ​ພື້ນ​ທີ່​ສ່ຽງ ໂດຍ​ສະເພາະ​ເມືອງ​ອູ​ຮັ່ນ​ທີ່ ແລະ ເມືອງ​ອື່ນໆ ໃນ​ປະເທດ​ຈີນ​ທີ່​ມີ​ການ​ລະບາດ

    – ລະວັງ​ການ​ສຳຜັດ​ພື້ນ​ຜິວ​ທີ່​ບໍ່​ສະອາດ ແລະ ອາດ​ມີ​ເຊື້ອ​ໂຣກ​ເກາະ​ຢູ່

     – ຄວນ​ລ້າງ​ມື​ໃຫ້​ສະ​ໝ່ຳ​ສະເໝີ​ດ້ວຍ​ສະ​ບູ່ ຫຼື ນ້ຳ​ຢາ​ລ້າງ​ມື​ຢ່າງ​ໜ້ອຍ 20 ວິນາທີ

    – ງົດ​ຈັບ​ຕາ ດັງ ປາກ ຂະນະ​ທີ່​ບໍ່​ໄດ້​ລ້າງ​ມື

    – ຫຼີກ​ລ່ຽງ​ການ​ໃກ້ຊິດ ສຳຜັດ​ສັດ​ຕ່າງໆ​ໂດຍ​ທີ່​ບໍ່​ມີ​ການ​ປ້ອງ​ກັນ

    – ຮັບ​ປະທານ​ອາຫານ​ສຸກ ສະອາດ ໃຊ້​ບ່ວງ​ກາງ ບໍ່​ຮັບ​ປະທານ​ອາຫານ​ທີ່​ເຮັດ​ຈາກ​ສັດ​ຫາ​ຍາກ

    – ສຳລັບ​ບຸກ​ຄະລາ​ກອນ​ທາງ​ການ​ແພດ ຫຼື​ຜູ້​ທີ່​ຕ້ອງ​ດູ​ແລ​ຜູ້​ປ່ວຍ​ທີ່​ຕິດເຊື້ອ​ໄວ​​ຣັສ Covid-19   ໂດຍ​ກົງ ຄວນ​ໃສ່​ຜ້າ​ອັດ​ປາກ ຫຼື​ໃສ່​ແວ່ນຕາ​ນິລະ​ໄພ ເພື່ອ​ປ້ອງ​ກັນ​ເຊື້ອ​ໃນ​ລະອອງ​ຝອຍ​ຈາກ​ຂີ້​ກະ​ເທິ​​ະ ຫຼື​ນ້ຳ​ມູກ​ເຂົ້າ​ຕາ.

    ສຸດ​ທ້າຍ​ຂໍ​ຝາກ​ໄວ້​ວ່າ ຢ່າ​ຕື່ນ​ຕົກໃຈ​ຈົນ​ເກີນ​ໄປ ແລະ ຢ່າ​ລືມ​ຕິດຕາມ​ຂ່າວສານ​ຢ່າງ​ຕໍ່​ເນື່ອງ​ຈາກ​ແຫຼ່ງ​ທີ່​ເຊື່ອ​ຖື​ໄດ້ ຄວນ​ກວດ​ສອບ​ຂໍ້​ມູນ​ໃຫ້​ແນ່ນອນ​ກ່ອນ​ຈະ​ເຊື່ອ​ໃນ​ທັນທີ.

ຊາວບ້ານ - ນຳ​ສະເໜີ

ຂ່າວທີ່ກ່ຽວຂ້ອງ