ຈັດລະບຽບຄືນໃໝ່

2.457 24 ກ.ພ. 2020 ນານາສາລະ

   ປີ 2020 ນີ້ ມີ​ຫຼາຍ​ເຫດ­ການ​ທາງ​ປະ­ຫວັດ­ສາດ ທີ່​ຈະ​ຕ້ອງ​ມີ​ການ​ສະ­ເຫຼີມ­ສະ­ຫຼອງ​ໃຫຍ່ ບວກ​ໃສ່​ກັບ​ການ​ດຳ­ເນີນ​ກອງ​ປະ­ຊຸມ 3 ຂັ້ນ​ຂອງ​ພັກ ກ້າວ​ສູ່​ກອງ​ປະ­ຊຸມ​ໃຫຍ່ ຄັ້ງ​ທີ XI ຂອງ​ພັກ ໃນ​ຕົ້ນ​ປີ 2021.

   ເມື່ອ​ເປັນ​ເຊັ່ນ​ນີ້ ຂະ​ບວນ​ການ​ຕ່າງໆ​ໃນ​ທົ່ວ​ປະ­ເທດ ຍ່ອມ​ມີ​ການ​ດຳ­ເນີນ​ການ​ຢ່າງ​ເປັນ​ຂະ​ບວນ​ຟົດ­ຟື້ນ ເພື່ອ​ສ້າງ​ຜົນ­ງານ​ຕ້ອນ­ຮັບ​ກອງ​ປະ­ຊຸມ​ດັ່ງ­ກ່າວ ສຳ­ລັບ​ນະ­ຄອນ­ຫຼວງ​ວຽງ​ຈັນ​ພວກ​ເຮົາ ກໍ​ມີ​ການ​ດຳ­ເນີນ​ກອງ​ປະ­ຊຸມ​ໃຫຍ່​ຂອງ​ອົງ­ຄະ​ນະ​ພັກ​ເມືອງ​ຮາກ​ຖານ ແລະ ໜ່ວຍ​ພັກ​ຢ່າງ​ເປັນ​ຂະ​ບວນ​ຕິດ­ຕໍ່​ກັນ ໄປ​ຄຽງ​ຄູ່​ກັນ​ນັ້ນ ບັນ­ຫາ​ສັບ​ປ່ຽນ​ຕຳ­ແໜ່ງ​ງານ​ຂອງ​ບຸ​ຄະ­ລາ​ກອນ​ໃນ​ການ​ນຳ​ຂັ້ນ​ຕ່າງໆ​ກໍ​ດຳ­ເນີນ​ໄປ​ເຊັ່ນ​ກັນ ມີ​ບັນ­ດາ​ທ່ານ​ອອກ​ຮັບ​ບຳ­ນານ ມີ​ທ່ານ​ຂຶ້ນ​ມາ​ແທນ ເຊິ່ງ​ເປັນ​ເລື່ອງ​ປົກ­ກະ­ຕິ​ໃນ​ຄະ­ນະ​ນຳ​ທີ່​ພວກ​ເພິ່ນ​ຮັບ​ໃຊ້​ຊາດ ຮັບ​ໃຊ້​ປະ­ຊາ­ຊົນ​ມາ​ຫຼາຍ​ປີ ເມື່ອ​ຮອດ​ອາ­ຍຸ​ກໍ​ຮັບ​ນະ­ໂຍ­ບາຍ​ບຳ­ນານ​ຕາມ​ກົດ­ໝາຍ​ກຳ­ນົດ​ໄວ້.

     ນອນ​ຢູ່​ໃນ​ຂະ​ບວນ​ການ​ສ້າງ​ຜົນ­ງານ​ຕ້ອນ­ຮັບ​ວັນ​ສຳ­ຄັນ​ຂອງ​ພັກ-ຂອງ​ຊາດ ກໍ​ຄື ການ​ດຳ­ເນີນ​ກອງ​ປະ­ຊຸມ 3 ຂັ້ນ​ນັ້ນ ມີ​ເພື່ອນ​ຜູ້​ອ່ານ​ສົ່ງ​ຄຳ​ເຫັນ​ມາ​ແລກ­ປ່ຽນ​ວ່າ ຄວນ​ມີ​ການ​ຈັດ​ລະ­ບຽບ​ຄືນ­ໃໝ່ ວ່າ​ຊັ້ນ!.

     ຂໍ​ໂທດ​ເນີ ບໍ່​ແມ່ນ​ສອນ​ແຂ້​ລອຍ­ນ້ຳ ຫຼື ກ້າວ​ກ່າຍ​ໜ້າ­ທີ່​ແຕ່​ຢ່າງ­ໃດ ? ພຽງ​ແຕ່​ຢາກ​ມີ​ຄຳ​ເຫັນ​ວ່າ ການ​ຈັດ​ລະ­ບຽບ​ຕ່າງໆ​ໃນ​ຂະ​ບວນ​ການ​ສ້າງ​ຜົນ­ງານ​ນັ້ນ ພວກ​ເຮົາ​ເຄີຍ​ເຮັດ​ມາ​ແລ້ວ ພົ້ນ​ເດັ່ນ​ກໍ​ແມ່ນ​ການ​ແກ້​ໄຂ​ປາ­ກົດ­ການ​ຫຍໍ້­ທໍ້​ທາງ​ສັງ­ຄົມ ການ​ປ້ອງ​ກັນ​ເວນ­ຍາມ-ກວດ­ກາ ຄວາມ​ສະ­ຫງົບ​ຮຽບ​ຮ້ອຍ​ຕາມ​ບ້ານ​ຕ່າງໆ​ໃນ​ທົ່ວ​ນະ­ຄອນ­ຫຼວງ... ຍິ່ງ​ໃນ​ເວ­ລາ​ການ​ແຜ່​ລະ­ບາດ​ຂອງ​ພະ­ຍາດ​ອັກ­ເສບ​ປອດ (Covid-19) ຈຶ່ງ​ມີ​ຄວາມ​ເຂັ້ມ​ງວດ​ໃນ​ການ​ກວດ­ກາ​ຄົນ​ເຂົ້າ-ຄົນ​ອອກ ຢູ່​ໃນ​ນະ­ຄອນ­ຫຼວງ​ພວກ​ເຮົາ ໄປ​ຄຽງ​ຄູ່​ກັບ​ການ​ກວດ​ແນວ​ອື່ນ ແລະ ຫັນ​ກຽວ​ລະ­ບຽບ​ທີ່​ວາງ​ອອກ ກໍ​ຄື ການ​ປະ­ຕິ­ບັດ​ຕາມ​ແຈ້ງ​ການ​ຕ່າງໆ​ຂອງ​ຂັ້ນ​ເທິງ ຖື​ເປັນ​ເລື່ອງ​ທີ່​ຄວນ​ດຳ­ເນີນ​ການ​ຢ່າງ​ເຂັ້ມ­ແຂງ ເພາະ​ເງື່ອນ­ໄຂ​ມັນ​ມີ... ພວກ​ມັກ​ທ້ວງ ມັກ​ຍຸ​ແຍ່​ທັງ­ຫຼາຍ​ກໍ​ບໍ່​ສາ­ມາດ​ຈີກ​ປາກ​ຮ້ອງ​ໄດ້​ຕາມ­ໃຈ​ຊອບ ເພາະ​ເຈົ້າ​ໜ້າ­ທີ່​ບ້ານ​ເມືອງ​ເພິ່ນ​ປະ­ຕິ­ບັດ​ຕາມ​ກົດ­ໝາຍ-ລະ­ບຽບ​ການ ຫຼື ວ່າ​ແຈ້ງ​ການ​ຕ່າງໆ ເພື່ອ​ສ້າງ​ຜົນ­ງານ​ຄຳ­ນັບ​ຮັບ​ຕ້ອນ​ວັນ​ສຳ­ຄັນ​ຂອງ​ຊາດ-ຂອງ​ພັກ​ເຮົາ ກໍ​ຄື ຂະ​ບວນ​ການ​ຕ້ອນ­ຮັບ​ກອງ​ປະ­ຊຸມ​ສາມ​ຂັ້ນ.

   ເຫັນ​ໄດ້​ວ່າ ຢູ່​ນະ­ຄອນ­ຫຼວງ​ພວກ​ເຮົາ ​ມີ​ບ່ອນ​ອີງ​ສາ­ມາດ​ປະ­ຕິ­ບັດ​ການ​ກວາດ​ລ້າງ​ປາ­ກົດ­ການ​ຫຍໍ້­ທໍ້​ຕ່າງໆ ​ໄດ້​ຢ່າງ​ສົມ​ເຫດ​ສົມ​ຜົນ ມີ​ແຕ່​ວ່າ​ໃນ​ການ​ຕັດ​ຕັ້ງ​ປະ­ຕິ­ບັດ​ນັ້ນ ​ພວກ​ເຮົາ​ຈະ​ເຮັດ​ຢ່າງ​ຈິງ​ຈັງ ແລະ ເຂັ້ມ​ງວດ​ພຽງ​ໃດ​ທໍ່​ນັ້ນ.

   ຂໍ​ເປັນ​ກຳ­ລັງ​ໃຈ​ໃຫ້​ເຈົ້າ​ໜ້າ­ທີ່​ປະ­ຕິ­ບັດ​ງານ​ຢ່າງ​ເປັນ​ຜົນ­ສຳ­ເລັດ.

ໂດຍ: ແນວລາວ

ຂ່າວທີ່ກ່ຽວຂ້ອງ