ຫູຊິແຕກ ເພາະສຽງເພງ

2.740 21 ກ.ພ. 2020 ນານາສາລະ

   ບໍ່​ດົນ​ມາ​ນີ້ ຜູ້​ຂຽນ​ໄດ້​ພົບ​ໝູ່­ຄູ່​ຮູ້­ຈັກ​ກັນ ພວກ​ເຂົາ​ມັກ​ຈົ່ມ​ເລື່ອງ: ຄົນ​ສາຍ​ເມົາ ສາຍ​ບັນ­ເທີງ ເປີດ​ເພງ​ດັງ​ຈົນ​ຫູ​ຊິ​ແຕກ ເຊິ່ງ​ມີ​ທັງ​ຮ້ານ​ບັນ­ເທີງ​ໃກ້​ເຮືອນ ໃກ້​ວັດ ຫຼື ບໍ່​ດັ່ງ­ນັ້ນ ກໍ​ແມ່ນ​ສາຍ​ເມົາ ສາຍ​ມ່ວນ​ເປີດ​ເພງ​ຢູ່​ເຮືອນ​ແບບ​ຕາມ­ໃຈ ແລະ ເປີດ​ສຽງ​ດັງ​ແຂ່ງ​ກັນ​ກໍ​ມີ ເຊິ່ງ​ສຽງ​ດັງ​ສົ່ງ​ຄື້ນ​ລົບ​ກວນ​ເຈ້ຍ​ຫູ​ຄົນ​ຢູ່​ອ້ອມ​ຂ້າງ​ຈົນ​ຫູ​ຊິ​ແຕກ.

   ຜູ້​ຂຽນ​ຈຶ່ງ​ຂໍ​ເວົ້າ​ເລື່ອງ: ຊາວ­ບ້ານ​ສາຍ​ມ່ວນ ສາຍ​ບັນ­ເທີງ​ກ່ອນ​ວ່າ ການ­ຈັດ­ຕັ້ງ​ບ້ານ​ບໍ່​ຄວນ​ເມີນ­ເສີຍ ແຕ່​ຄວນ​ປຸກ­ລະ­ດົມ​ແຈ້ງ​ເຕືອນ​ບາງ​ຄົນ ບາງ​ຄອບ­ຄົວ​ສາຍ​ບັນ­ເທີງ ໃຫ້​ພວກ​ເຂົາ​ເປີດ​ເພງ​ສຽງ​ດັງ​ຢ່າງ ເໝາະ​ສົມ ບໍ່​ລົບ​ກວນ​ຄົນ​ອື່ນ​ຢູ່​ໃກ້​ຄຽງ ເພາະ​ບາງ​ຄົນ​ໄປ​ເຮັດ​ວຽກ​ເມື່ອຍ​ມາ​ຫວັງ​ຈະ​ນອນ​ດີໆ ແຕ່​ບໍ່​ສາ­ມາດ​ນອນ​ໄດ້ ຍ້ອນ​ສຽງ​ເພງ​ຈົນ​ຝາ​ເຮືອນ​ສັ່ນໆ ຖ້າ­ວ່າ​ການ­ຈັດ­ຕັ້ງ​ຂັ້ນ​ລຸ່ມ​ບໍ່​ເລາະ​ເບິ່ງ ຫຼື ຕິດ­ຕາມ ປ່າວ​ຂ່າວ​ຕັກ­ເຕືອນ ກໍ​ຖື​ວ່າ​ລະ­ເລີຍ​ໜ້າ­ທີ່ ສຳ­ລັບ​ຮ້ານ​ບັນ­ເທີງ ເຂົ້າ­ໃຈ​ວ່າ ພວກ​ເຮົາ​ມີ​ດຳ­ລັດ​ວ່າ​ດ້ວຍ​ການ​ບັນ­ເທີງ ເລກ​ທີ 315 ລົງ​ວັນ​ທີ 02/10/2017 ໄດ້​ກຳ­ນົດ​ຢ່າງ​ລະ­ອຽດ​ໄວ້​ແລ້ວ ຜູ້­ກ່ຽວ​ກໍ​ຄວນ​ປະ­ຕິ­ບັດ​ຕາມ ເຊິ່ງ​ລາຍ​ລະ­ອຽດ​ເລື່ອງ​ສຽງ​ຂໍ​ຍົກ​ມາ​ສະ­ເໜີ​ບາງ​ມາດ­ຕາ​ລຸ່ມ​ນີ້:

   ມາດ­ຕາ 19 ມາດ­ຕະ­ຖານ​ບັນ­ເທີງ ປະ­ກອບ​ດ້ວຍ ມາດ­ຕະ­ຖານ​ລວມ ແລະ ມາດ­ຕະ­ຖານ​ສະ­ເພາະ ຂໍ້​ທີ 8 ໄດ້​ກຳ­ນົດ​ບອກ​ເລື່ອງ​ລະ­ບົບ​ສຽງ: (1) ຄວາມ​ດັງ​ຂອງ​ສຽງ​ຕ້ອງ​ຕ່ຳ​ກວ່າ 85 Decibel (AB) (2) ບໍ່​ສົ່ງ​ສຽງ​ເນືອງ​ນັນ​ລົບ​ກວນ​ພາຍ​ນອກ ຫຼື ບໍ­ລິ­ເວນ​ໃກ້​ຄຽງ (3) ບໍ່​ສົ່ງ​ຜົນ​ຮ້າຍ ຫຼື ອັນ­ຕະ­ລາຍ​ຕໍ່​ລະ­ບົບ​ປະ­ສາດ ແລະ ສຸ­ຂະ­ພາບ ໝວດ​ທີ 5 ມາດ­ຕາ 28 ຂໍ້​ທີ 9 ກໍ​ໄດ້​ບອກ​ເນັ້ນ​ໄວ້​ຕື່ມ​ອີ​ກວ່າ: ຫ້າມ​ສົ່ງ​ສຽງ​ເນືອງ​ນັນ​ລົບ​ກວນ​ບຸກ­ຄົນ ຫຼື ສັງ­ຄົມ​ພາຍ​ນອກ​ສະ­ຖານ­ທີ່​ບັນ­ເທີງ.

   ສະ­ຫຼຸບ​ໄດ້​ວ່າ: ເມື່ອ​ເກີດ​ມີ​ຫາງ​ສຽງ ພວກ​ເຮົາ​ກໍ​ຄວນ​ມີ​ການ​ກວດ­ກາ​ຕິດ­ຕາມ​ແກ້​ໄຂ​ຢ່າງ​ຈິງ​ຈັງ​ໃຫ້​ກວມ​ລວມ ທັງ​ບຸກ­ຄົນ ຫຼື ກຸ່ມ​ຄົນ ສາຍ​ມ່ວນ ສາຍ​ບັນ­ເທີງ​ເປີດ​ເພງ​ບໍ່​ເກງ​ໃຈ​ໝູ່ ຫຼື ບໍ່​ສົນ­ໃຈ​ຄົນ​ອື່ນ ເພື່ອ​ໃຫ້​ບ້ານ​ເມືອງ​ເກີດ​ຄວາມ​ສະ­ຫງົບ​ຢູ່​ຮ່ວມ​ກັນ​ຢ່າງ​ສັນ­ຕິ.

ຂ່າວທີ່ກ່ຽວຂ້ອງ